Tirfurv rewlivel

Klass	tirfurv
Acheson	Argerdh rewlivel
	Restrennow kelmys war Gemmyn Wikimedia

Tirfurvow rewlivel yw an tirfurvow a sew gwrians gans rewlivow.

Gwrians rewlivow

Moy a ergh a godh y'n menydhyow ha tevi a wra an rewliv. Gwaskys yw ergh dhe vos firn po ergh kesstrothys kyns furvya rew. An rew a dhalleth slynkya tro'ha'n iseltiryow. Drefen bos kemmys rew, an rewliv a yll treusvewa a woles dhe'n erghlinen. Yma diw barth dhe rewliv, an barth kreuni may hwra an rewliv tevi, ha'n barth ablasya, le may hwra teudhi.

Argerdhow ha tirfurvow esknians

Komm yw nans rewlivel shap bolla gans kilfos serth ha tenwennow serth. Yntra dew gomm yma keyn kul henwys krib. An rewliv a wra rewi orth gilfos an komm, ha tenna karrek yn mes orth vovya. Destryppya yw hanow an argerdh ma. War woles an komm, an rewliv a us an karrygi ha'y boos dhe ruttya po skravinas an garrek weli. Awos hemma, an garrek weli yn dann an rewliv yw leven po kravasys. Y hwelir gweles skravinsansow yn fenowgh war an garrek weli. An rewliv a us y boos dhe herdhya stoff yn rag. Herdhyans rewliv a yll terri karrygi yn rag ynwedh.

Mars hwra dew rewliv komm omjunya, yma dhe'n rewliv moy a boos, ytho yth eskni moy. Y'n fordh ma, furvyes yw nans U po nans furv U. An kommow yw gesys ughel a ugh leur an nans U, ytho gelwys yns i krognansow. Wosa an rewliv dhe deudhi, lenwys yw leur an komm gans lynn komm, ha lynn hirgul war leur an nans U. Treweythyow kevres a gommow a furv, an eyl a ugh y gila, pubonan lenwys gans lynn, tirfurv henwys lynnyn paderow.

Mar ello an rewliv dres darn a garrek weli, ev a wra skravinas an tu yn bann an liv, ha destryppa an tu war nans an liv. Ytho gwrys yw karrek vols.

Argerdhow ha tirfurvow godhesans

An rewliv a deudh pan vo tempredhow ughella. Drefen nerth an rewliv, ev a yll karya stoff a bub myns, dhyworth tewes ha pri dhe vili meur. Hanow an godhes ma yw rewtinyow. An brassa rann a'n godhesa a hwer war benn isella an rewliv, yn tommen meur henwys pennmarian. Ynwedh, yma godhesans yn dann an rewliv plastrys a-dreus an tir (selvarian). Movyans an rewliv a yll shapya an selmarian dhe furvow breow kromm gelwys bronnow. Bronnek yw hanow an tirwedh pan vo niver anedha. Mars eus avon yn-dann an rewliv godhesys yw tommen hir gwius henwys esker pan wrello kildenna an rewliv. Pansow war enep an rewliv a lenow gans godhes, ha pan deuttho an rewliv, i a furv bre byghan gelwys knegh growan. An tylleryow mayth o rew kyns a furv pollow byghan wosa an rew dhe deudhi henwys pollow kalter.

Tirfurvow frosrewlivel

Avonow ha frosow ow resek dhyworth an rewliv a wra digemyska an rewtinyow, ytho godhesys yw gweliow a dewes, pri ha grow, hag a greg war nerth an fros. Hemm yw an leskargva. Mar leun a wodhes yw an avonow i dhe omranna a-dro dhe enesow a dewes ha grow, furv henwys avon blethys.