John Keigwin

Dhyworth Wikipedya, an godhoniador rydh
Restren:Arvow Keigwin.png
Cota arvow Keigwin.[1]
Keigwin House

John Keigwin (1641-1716) o antiqwary ha Kernoweger, genys in Porth Enys, Kernow. "Uheldas" o va a'n antiqwarys in Penwyth West, i'ga mysk teylu Boson, Wella Gwavas, Thomas Tonkin, William Borlase, Oliver Pender, ha James Jenkins a Alverton. War-lergh Lhuyd ha Borlase, skentoleth Keigwin a-dro dhe'n tavas Kernowek o "down ha cowal" (profound and complete). "Den deskys fur" o va war-lergh John Boson.[2] Th'era va ajon Frenkek, Latyn, Grew, hag Ebrow ynwedh.

Keigwin a wrug an treylyansow Sowsnek a Pascon Agan Arluth (rag Syr Jonathan Trelawny, Epscop Caresk) ha Creacon of the World a venja bos dyllys gans Davies Gilbert yn 1826 ha 1827. Dew gernowekheans an Pader ev a wrug (onen yn Kernowek Cres ha'n eyl yn Kernowek Dewedhes), warbarth gans kernowekheansow an Deg Lavar Duw, an kensa chaptra a Lever Jenesis, ha lether Charlys I dhe'n Gernowyon. War-lergh Henry Jenner, th'era nyver a "gabmwreansow coynt" (extraordinary mistakes) yn treylyans Keigwin a'n gwariow Pascon ha Creacon.[2] Jenner ha P. Berresford Ellis rug merkya Keigwin dhe ûsya an ger Ebrow milchamath rag "war" in treylyans lether Charlys.[3] Jenner a bredery ynwedh bos Keigwin re wothus a-dro dh'y aswonvos.

John Boson a screfas screfen-bedh Keigwin: can a beder linen yn Kernowek:

En Tavaz Greka, Lathen ha’n Hebra,
En Frenkock ha Carnoack deskes dha,
Gen ol an Gormola Brez ve dotha
Garres ew ni, ha Neidges Ewartha.[4]

An erthygel-ma yw screfys yn Kernowek Standard.

Pednventynyow[golegi | pennfenten]

  1. Aghscrif ha cota arvow Keigwin
  2. 2.0 2.1 Henry Jenner (1904). Handbook of the Cornish Language.
  3. Peter Berresford Ellis (1974). The Cornish Language and its Literature. Routledge. ISBN 978-0-710-07928-2. Orth Google Books
  4. John Boson (1715). Gwers yn enor John Keigwin, orth www.moderncornish.co.uk

Kevrednow yn-mes[golegi | pennfenten]

Porth Kernow – Tre rag folennow ha klassys Wikipedya a-dro dhe Gernow.