Robert Walling
| Robert Walling | |
|---|---|
| Genys |
1895  |
| Mernans |
1976 |
| Kenedhlogeth |
Ruvaneth Unys, Ruvaneth Unys a Vreten Veur hag Iwerdhon |
| Galwesigeth |
jornalyas, prydydh |
| Eseleth |
Gorsedh Kernow |
Robert Victor Walling (5 Meurth 1895 - 30 Gortheren 1976), o souder, bardh, jornalyas ha skrifer gans bern arbennik y’n yeth Kernewek.
Bewnans a-varr
[golegi | pennfenten]Genys veu yn Aberplymm yn 1895, an kynsa a beswar flogh dhe Robert Alfred Walling, jornalydh ha golegydh paper nowydh, ha Florence (neé Greet). Adhyskes veu ev yn Skol Ramasek Aberplymm. Wosa henna ev a gavas ober avel deriver dhe’n Western Daily Mercury, 1912–1914. Yn Kynsa Bresel an Bys ev a veu kapten y’n Artyllery Riel Tregys, le may hwrug servya yn Pow Frynk. Goliys veu yn Batel Passchendaele yn 1917.
Ev o golegydh Cunard Daily Bulletin and Magazine yn Liverpool yn 1919, ha'y removas dhe Golkata avel isgolegydh The Statesman a-dhia 1921 bys dhe 1924 hag ena remova dhe Manchester avel isgolegydh an Manchester Evening News. Yn 1926 apoyntys veu avel skrifenyas Fondyans Jornalydhyon ha golegydh y lyver termyn.
Yn Eynda, ev a vetyas Ida Violet Harvey. Hi o gwrek Charles Edward Pinckney y'n eur na. Robert hag Ida a viajyas dhe Bow Sows war-barth yn 1923. I a dhemedhis yn 1937 wosa mernans Pinckney. Yn 1939 trigys ens i gans kerens Robert yn Aberplymm, le mayth o Robert jornalydh hwath gans bern yn materyow morek.
Rann dhiwettha y resegva o spenys avel golegydh an South Devon Times, paper nowydh seythennek.
Bern y’n yeth Kernewek
[golegi | pennfenten]Pan veu yowynk hag yniys gans y das, ev a veu ynspirys gans lyver Henry Jenner, A Handbook of the Cornish Language. Dres spisyow yn klavjiow breselek ev a askorras lyver termyn lymnys An Houlsedhas yn Kernewek yn y dhornskrif y honan. Tri dyllans veu skrifys, pubonan heb bos gorfennys, war-barth ha lymnanow ganso. Walling a dhevynnas tus erel yn Kernewek, mes lower a'n dalghow yw ganso y honan. Pur bosek yw an lyver termyn rag konvedhes studh an Dasserghyans Kernewek y’n dedhyow a-varr, ha fatel veu an yeth ow tisplegya.
Berdhys veu Walling avel bardh Gorsedh Kernow yn 1934 gans an hanow bardhek Scryfer an Mor. Y das a veu berdhys yn 1942 gans an hanow bardhek Gwallon Dewnans.
Komprehendys veu Walling ha'y istori yn Kynsa Bresel an Bys y'n gwari gans Alan Kent Surfing Tommies.