Margaret Steuart Pollard
| Margaret Steuart Pollard | |
|---|---|
| Genys |
1 Meurth 1903  |
| Mernans |
13 Du 1996 Truru |
| Kenedhlogeth |
Ruvaneth Unys, Ruvaneth Unys a Vreten Veur hag Iwerdhon |
| Alma mater |
|
| Galwesigeth |
skrifer, prydydh |
| Tas |
John Steuart Gladstone |
| Eseleth |
Gorsedh Kernow |
Gor-gor-nyth dhe Bennmenyster William Gladstone, awtour, benelegor, bardh Kernewek ha skoler Sanskrytek o Margaret Steuart Pollard née Gladstone (1 Meurth 1903 - 13 Du 1996), aswonnys ynwedh avel Peggy Pollard. Hi ynwedh o fondyer an kowethas kevrin 'Bagas Ferguson', dell wre drehevel arghans dhe'n Trest Kenedhlek.
Hi a dhemedhas an istorier kernewek Frank Pollard yn 1928, treylyes dhe vos Katholik yn 1957 ha merwel yn Truru, Kernow 13 Du, 1996.
Megyans hag adhysk[golegi | pennfenten]
Genys veu yn 2 Whitehall Court, Loundres, Gool Davydh 1903. Myrgh o dhe John Steuart Gladstone (1862–1920), gwikor y'n Est Kres ha'y wrek Anne Fitzgibbon. Hy thas o noy dhe'n pennmmenyster livrel W.E.Gladstone, ha hi a gavas gallos akademek hy thas. Wosa ev dhe verwel yn 1920, hi eth dhe Golji Newnham, Kargront, mayth o hi an venen gynsa dhe waynya gradh kynsa klass yn yethow Sanskrytek ha Pali. Yn 1952 hi a dhegemeras doktourieth ha dyllys veu erthyglow gensi war destennow Sanskrytek ha Kristonedh an Est.
Awtour Kernewek[golegi | pennfenten]
Yn 1928 hi a dhemedhas Kapten Frank Pollard, awtorita war istori Kernow, konseler dhe Konsel Kernow ha kapten y'n Morlu. An keth bledhen y teuth Pollard dhe vos bardh Kernewek hag esel a Orsedh Kernow gans an hanow Arlodhes Ywerdhon. An hanow a dheu dhyworth karrek ogas dhe Bedn an Wlas henwys "Irish Lady" dhe enora benen veu yn torva lester na allas hy sawya, mes leverys yw dell wrello hy tharosvan diskwedhes yn hager-awel.
Pollard a waynyas pewas lien an Orsedh yn 1940 gans Bewnans Alysaryn (dyllys yn 1941), 'pastiche' war dhramas Kernewek kresosel, onan a'n chif pennfentenyow Kernewek arnowydh. Caradar a dheskrifas an drama dhe vos ober posek y'n Dasserghyans Kernewek. Hi a skrifas dew dhrama aral: Synt Avaldor (arta selyes war dhramas an osow kres) a waynyas an pewas kynsa yn 1941; ha Synt Tanbellen (ow tochya tus an orsedh) an vledhen awosa. Y'n gwettha prys ny vons an dhew ma dyllys. Pollard o telynores an Orsedh rag bledhynnyow, ow kwari telyn iwerdhonek byghan.
Yn 1947 Margaret Pollard a skrifas Cornwall, lyver delinys gans Sven Berlin hag a dheskrifas an spys na. Hy thybyansow a-dro dhe dalvosogeth honanieth may hwrello Kernow dihaval orth gonisogethow erel yw a vri hwath. Profyes yw an lyver dhe Epskop Truru, Dr J.W.Hunkin. Pollard a oberi dhodho avel skrifenyades nebes bledhynnyow. Hi a worfenn an lyver gans an geryow Bedheugh bynatha Kernewek.
Pollard ynwedh o pur hewul, brosyores wresek, awtorita war ever ha gweythresek rag gwithans Kernow. Skrifenyades Kernow yn Kussul rag Sawya Pow Sows Powek 14 bledhen, ha hi a oberas rag defendya Kernow orth gordhisplegyans.
Onan a ganow Pollard a wra solempnya sawya Als Mayon, 38 erow yn Pedn an Wlas, orth "bryckys ha pals a gestevyn". Hi o skoodhyer fenowgh dhe'n Trest Kenedhlek yn Kernow, hag avel rann a vagas a venenes dihanow (hanow an bagas o "Ferguson's Gang"), hi a weresas drehevel mona rag sawya arvor Kernow. Lyver Clough Williams Ellis, England and the Octopus (1928) a veu delanwes war an bagas. Yn-dann gel, eseli a'n bagas a wrussa drehedhes pennplas an Trest Kenedhlek yn Loundres, gasa fughanow rag aswon aga honan avel esel a'n bagas (hanow Pollard o Bill Stickers), droppya an sagh a arghans ha mos mes a wel.
Katholigieth[golegi | pennfenten]
Yn 1957 hi eth a bos Katholiges, ha gweres pareusi tir hag arghans rag drehevel eglos Gatholik war dyller chapel kresosel Our Lady of the Portal a St Piran yn Truru, kowlwrys yn 1973.
Y'n 1960ow hi a ros hy fythow byskar dhe ves. Ha hi koth, hi a drig yn sempel yn unn stevel, lowen ha kosel yn hen growji tus bal sten yn Sen Ke. Hwath hi o hegar, gwresek ha hwithrus a'n bys a-dro dhedhi. Hi o benen hir, rasek, gwiskys yn losten hir ha lien konna kelmys a-dro dh'y fenn. Skoler europek o hi hwath, gwresek ow tochya Kernow, ond moy vyth, hi o Katholiges lel ha kerensedhek. Hi a dhegemeras an Pewas Benemerenti dhyworth an Pab y honan.
Hi a besyas oberi ha hi moy ages 70 bloodh, gans treylyansow a Slavonek an Hen Eglos. Hi a dhuryas skrifa hymnys, kana yn Latin, Kernewek ha Sowsnek. Hi a guntellas mona rag skoodhya benenes du yn Afrika Soth. Pan veu ogas dhe 80 bloodh, hi a hembronkyas pergherinses dhe Almayn soth.
Mernans[golegi | pennfenten]
Hi a verwis yn Truru, Kernow, 13 Du 1996. Y skrifas Ann Trevenen Jenkin kofheans glew yn paper nowodhow an Independent 7 Kevardhu 1996.
Rol lyvrow[golegi | pennfenten]
- Pollard, Peggy (1941) Bewnans Alysaryn gans dyllys gans James Lanham, Porthia 1941
- Bagnall, Polly & Beck, Sally (2015) Ferguson's Gang: The Remarkable Story of the National Trust Gangsters Pavilion Books
- Limb, Sue (2014) Breaking Bounds: Six Newnham Lives Newnham College, Caergrawnt.
- Hutton-North, Anna (2013) Ferguson's Gang - The Maidens behind the Masks. Lulu Inc.
- Pollard, Peggy (1947) Cornwall, Loundres: Paul Elek.