Kleves

Ensampel a	kleves, variable-order class
Klass	kudyn yeghes, biological process, maner a vernans
Konter a	yeghes
Acheson	Maynor kawsya kleves
Synsys ynno/i	congenital disorder, acquired disorder
	Restrennow kelmys war Gemmyn Wikimedia

Kleves po studh medhegel ew studh anyagh ma hwer neppeth drog dhe gorf mabden po brys. Klevesow a ell kawsya payn, radnow a'n korf dhe lettya oberi an vor' ewn, po mernans. An ger kleves terweythyow a gomprehend:

radnow a'n korf bos shyndys,
lettys ew nebes a allasow an korf,
kalatterow po syndromow medhegel,
klevesansow gen korrorganedhow pekar ha bakteria po virusys,
omgleves anyagh, pekar ha godhevel payn po omglewes tobm (gelwys arwodhow),
shapys anusadow a radnow korf.

Skilys

Lies tra a ell kawsya kleves. Terweythyow bakteria a dheu a ji a'n korf dre voos, dhowr po ayr. Nebonan a ell bos klevesys gen maynoryon pekar ha bakteria, virysys po fongow. Ewedh, kawsys ew kleves dre voos drog po koth hag a gomprehend bakteria hag erel. Terweythyow an bakteria a askor kemygednow po gwenenyow a gaws an kleves.

Onan a'n skilys moyha kebmyn a gleves ew yeghesweyth drog ha fowt a dhowr glan. Nebes klevesow merwel pekar ha malaria en tiredhow trovadnek an bes ew lesys gen moskito. Enevales a les kleves ew henwys vektors. Ma lies vektow, ow komprehendya bulhornes, torek ha hwann.

Genys ew nebes gen klevesow genetek. An re ma ew klevesow drefen kabm po treylyans en DNA an person. Ensampel a dreylyans en DNA ew kanker. Bewa po oberi en kerhydnedh anyagh ewedh a ell kawsya klevesow. Klevesow ew moy kemmyn en hen dus.

Dyghtyansow

Gweresys ew nebes klevesow gen medhegnethow. En venowgh gwellhes ew klevesans gen gorthviotigow, bes defens gen an bakteria ew kaletter uji owth enkressya. Gweresys ew nebes klevesow gen leuvvedhegneth, bes nag ew possybyl gweres pub kleves gen medhegneth po leuvvedhegneth. Res ew dyghtya nebes klevesow dres bewnans oll, hebm ew, klevesow hirdermyn (Sowsnek - chronic, po ow turya rag hir) enjei. Ensampel a gleves hirdermyn ew kleves melys. Possybyl yw dhe dhyghtya arwodhyow kleves melys bes nag ew possybyl bos delivrys dhorto. Tus a dhyght klevesow dell ew usys ew gelwys medhogyon.

Lestans

Prevys ew pobel rag nebes klevesow hag ew kebmyn po pur dhrog ha na dhiskwedh arwodhow hogen. Mars ew kevys an klevesow ma a-varr, possybyl ew aga dyghtya kens anjeii dhe gawsya kaletterow. Ensampel a via previ benen rag kanker an kodna brys (cervix) gen prov. Mars ew an kanker diskudhys a-varr, possybyl ew y yaghhe. Mars ew kevys diwettha, mernans ew an sewyans dell ew usys.

Ensampel aral ew immunheans. An tybyans ew rag gul an korf parys rag kleves.Ma dhe'n korf y dhefens y honan erbydn klevsow henwys an system immun. Gnas arbednek an system immun ew y allos dhe berthi kov klevesow. Mars ew person klav ha yaghhe, an system immun a wra stoff henwys gorthkorfow a omladh an kleves mar teffo arta dhe'n person.

An gorthkorf ew komparek dhe udn kleves en udnik. Ensampel ew an brygh rudh kawsys gen virus. Furv klor a'n virus ew res dhe'n person (flogh dell ew usys) nag o klav gen an brygh rudh besketh. Hebm a gaws an system immun dhe askorra gorthkorfow er y bydn. Mar kwra an keth person kestava an keth virus e'n termyn a dheu, system immun an person a vydn perthi kov hag omladh an virus.

Rag difresyans dhe vos dhe les:

Res ew diskudha ha lettya an kleves a-varr.
An kleves a dal bod kebmyn po es y ajon.
E tal dhe’n prov rag an kleves bos es, oberi pup kentel heb pystiga tus.
An kowethas ew adhyskys ha gallos ajon an arwodhow moyha kebmyn rag nebes klevesow.
E tal dhe’n dyghtyans rag an kleves bos saw hag es y gawas.

Epidemionieth

Epidemionieth ew an studhyans a skilys klevesow. Nebes klevesow ew moy kebmyn rag pobel gen gnasow kebmyn, avel devedhyansow dorydhek po socyologiethek haval, boos po kenedhlogeth. Heb hwithrans epidemionethel da, nebes klevesow a ell bos kalish dhe dhiskudha ha henwel. Possybyl ew dhe gemyska dew gleves. Etho epidemionieth ew pur bosek rag konvedhes fatel ell medhogyon agan gwitha erbydn virusys, gwenenyow ha bakteria.

An person aswonys avel tas epidemionieth ew Archibald Leman Cochrane CBE (12 Genver 1909 – 18 Efan 1988). Genys veu gen porfyrya, kleves genetek. Ev a wrug hwithrans a-dro dh’y deylu rag konvedhes dhort py skorren y teuth.

Rol a glevesow gen henwyn Kernowek

Hanow Sowsnek	Hanow Kernowek	Skila
Acne	Kuriegi	Genetek
AIDS	Syndrom Immunodifyk Akwirys	Virus
Anthrax	Anthraks	Bakteriom
Asthma	Asthma	Genetek ha kerhydnedhel
Beriberi	Beriberi	Fowt a vitamyn B2
Bronchitis	Bronkitis	Virus
Bubonic plague	Pla bubonek	Bakteriom
Cerebral palsy	Palsi a’n ampydnyon	Damach dhe’n ampydnyon
Chickenpox	Brehi yer	Virus
Cholera	Terthen skit po colera	Bakterium
Cirrhosis	Kaletter an avi	Goreva
Cold (Coryza)	Anwos	Virus
Covid 19	Kurungylgh 19	Virus
Diabetes	Kleves melys	Fowt askorrans insulin e'n pankreas
Diphtheria	Diftheria	Bakteriom
Eczema	Klavor gleb	Alergedh
Epilepsy	Drogatti po epilepsi	Anwodhevys
Gastroenteritis	Fagel kolodhyonen	Virus, Bakteria po fong
German measles	Brehi Almayn (rubella)	Virus
Goitre	Hwedh lonk	Fowt a thyroksin
Gonorrhoea	Hasliv	Bakteriom
Heart disease	Kleves an golon	Bewedh
Hepatitis	Kleves avi	Virus
Herpes	Ereras po herpes	Virus
Influenza	Flou	Virus
Jaundice	Kleves melyn	Levelyow uhel a vilirubin
Leprosy	Lovryjyon (po klavor)	Bakteriom
Malaria	Kern an lewgh (po malaria)	Arvil
Measles	Brehi rudh (po leveljya)	Virus
Mumps	Pedn sagh	Virus
Pleurisy	Kennen skevens	Virus
Pneumonia	Fagel skevens (po tanyjyon)	Virus
Polio	Palsi flehes	Virus
Porphyria	Kleves purpur (po porfyrya)	Genetek
Psoriasis	Skansgroghen	Genetek
Rabies	Koner	Virus
Rheumatism	Fydn (po remm)	Varyansek
Rickets	Leugh	Fowt a vitamyn D
Scarlet fever	Kleves kogh	Bakteriom
Schizophrenia	Skitsofrenia	Genetek?
Scrofula	Kleves an matern	Bakteriom
Scurvy	Kleves mor	Fowt a vitamyn C
Shingles	Eresas	Virus
Smallpox	Bregh (po pockys munys)	Virus (Difeudhys)
Syphilis	Pockys Frynk	Bakteriom
Tetanus	Genbalsi (po tetanus)	Bakteriom
Thrush	Kann (po brash)	Fong
Tuberculosis	Pla gwydn	Bakteriom
Typhoid	Terthen vrith (po tyfoyd)	Bakteriom
Typhus	Tyfus	Bakteriom
Whooping cough	Pes garm	Bakteriom
Yellow fever	Febyr melyn (po terthen velyn)	Virus drefen bros moskito