Hwistel

Hwistel
	Hwistel
Klassans bewoniethek
Gwlaskor:	Animalia
Fylum:	Chordata
Klass:	Mammalia
Urdh:	Eulipotyphla
Teylu:	Talpidae
Kinda:	Sorex; Linnaeus, 1758
	Gwrandrans an hwistel

An hwistel, po logojen vinek kebmyn (henwys common shrew po Eurasian shrew en Sowsnek), ew an hwistel voyha kebmyn (hag onan a'n bronoges moyha kebmyn) en Europa ha Breten Veur. Nag ew kevys en Wordhen. Hy hes kresek ew tredh 55 dhe 82 mm ha'y foos tredh 5 ha 12g. Hy milvlew ew gell tewl, bes moy gwadnliwek ew en-dadni. Ma dhe'n hwistel dewlagas bian, tron minek ha dens gen bleyn rudh. Hys bownans kresek dhe'n hwistel ew 14 mis. Gweythresek enjei dedh ha nos, ow kemeres powesow berr tredh spisow hirra a aktivita.

Bewva

Kevys ew hwistles en gwedhegi, gwelstiryow ha keow Breten, Loghlyn ha Europa est. Pub hwistel a wra tiredh tre a 400-600 m². Fest tiredhel ew hwistles hag anjei a omladh rag defendya an tiredh en argasus.

Megyans

Ma dhe'n hwistel megyans kigdebrus ha hweskerdebrus ow komprehendya hwesker, melhwes, kevnis ha buluk. Res ew dhe anjei debri 200-300% a'ga foos korf pub dedh oll rag treusvewa. Famya a wra hwistel ma na dheber pub nebes ouryow. Na ell anjei gwavgoska drefen bos aga horfow re vian. Rag treusvewa an gwav, aga kregyn pedn a leha 20% ha'ga ampydnyon gen 30%. Anjei a wayn poos arta e'n gwenton. Maa dhe'n hwistel golok boghosek, etho ma anjei owth usya aga sensow a sawor ha klewes rag helghya.

Parya

An seson parya a dhur tredh mis Ebrel ha mis Gwydngala, bes moyha kebmyn ew e'n hav. Woja hes degyans a 24-25 dedh, ma an vabm ow tinythu teylu a 5-7 flogh. Tednys enjei dhort an vrodn woja 25 dydh. Hwistles yonk a furv 'karavan' a-dryv aga mabm, pub yonker a dheg lost y vroder en y anow.

Difresyans

Nag ew an hwistel ehen beryllys, bes en Breten Veur gwithys ew rag nebes sortow a ladha herwydh an lagha. Chif preydhoryon hwistlow ew oulys, kathes, lovennanes, serf, konaow gwydn ha lewern.

Hwistel ow hwilas boos

Ma an erthygel ma usya an Furv Skrifys Savonek a-barth Kernowek diwedhes.