Edmund Henry Hambly

Edmund Henry Hambly
Edmund Henry Hambly
Genys	24 Meurth 1914
Mernans	9 Meurth 1985
Alma mater	Blundell's School ;
Soodh	esel Konsel Konteth Loundres, leuvvedhek orthopedek
Pries	Elizabeth Mary Cadbury
Fleghes	Elizabeth Cadbury Hambly
Eseleth	Gorsedh Kernow

Dr Edmund Henry Tregothwyn Hambly MRCS; FRCS; MB BS; LRCP (24 Meurth 1914 – 9 Meurth 1985), o leuvvedhek orthopedek, politeger dhe'n Parti Lavur ha Livrel, ha skoodhyer, bardh ha prydydh an yeth Kernewek.

Teylu

Genys veu Hambly yn Porthysek, Kernow, mab Edmund Hambly ha'y wrek Gertrude Mary Hotten ha mab wynn Henry Albert Hambly ha'y wrek Anne née Trevan. Ev a gavas adhysk yn Skol Blundell's, Tiverton, Dewnens. Ev a dhemedhis Elizabeth Mary Cadbury (myrgh wynn dhe George Cadbury, fondyer Bourneville, an weythva choklet), medhek magata. I a gavas peswar flogh, myrgh ha tri mab. Esel gweythresek o a Gowethas an Kothmans (An Grenoryon). Ev a removas dhe Konteth Buckingham y'n 1940ow. Gwrys veu Frankburjes Cita Loundres.

Resegva alwesik

Hambly a dhendylas bos recevys avel medhek yn 1937 pan radhyas dhyworth Klavji St Bartholomew. Ev a dhegemeras Kesvredereth Kolji Riel Leuvvedhogyon yn 1938. Ny ylli omjunya an luyow ervys yn Nessa Bresel an Bys drefen yeghes drog. Leuvvedhek yn Stret Harley o ha chif skoodhyer leuvvedhegneth orthopedek yn Klavji Westminster ha'n Klavji Orthopedek Riel dres an vresel. Yth esa bern arbennik dhodho ow tochya dyghtyans an askorn keyn ha nervennow amalek yn soudoryon goliys. Wosa an vresel, apoyntys veu avel pennvedhek Klavji Pennsevik Kembra, Tottenham, an Klavji Riel, Richmond ha Klavji Acton. Ev a oberas bys dhe 1969 pan veu res dhodho omdenna drefen yeghes drog. Esel gwiskys o a Gowethas Wordhi Apotecarys. Ynwedh tiek o yn Kernow.

An yeth Kernewek

Edmund Hambly o onan a'n kowetha dhe Robert Morton Nance ha pur weythresek o y'n Dasserghyans. Berdhys veu yn 1932 y'n solempnita yn Dons Meyn, Pluwveryan gans an hanow bardhek Gwas Arthur. Esel o a'n Orsedh hanter kans bledhen ha moy, ow tegi an kledha yn lies solempnita. Ev o fondyer 'Tyr ha Tavas', ragresydh dhe Mebyon Kernow. Ev ynwedh o fondyer an servis bledhynnyek yn Kernewek, a dhastallathas yn Tewydnek yn 1932. Dyllys veu kan ganso Dew genes, a Gernow y'n lyver termyn 'Kernow' yn 1933, ha Mebyon Kernow yn 'An Lef Kernewek' yn 1973. Ev ha'y wreg a wrug akord gans an Trest Kenedhlek rag lettya gordhisplegyans yn powdir ranndir Porthysek yn 1963.

Resegva politegel

Hambly a omjunyas an Parti Lavur. Yn 1946 etholys veu dhe Gonsel Konteth Loundres, kannas dhe Lewisham Est. Apoyntys veu avel iskaderyer kessedhek towlenna tre ha posdir. Ytho ev a gemeras rann weythresek yn towlenna Loundres wosa an vresel. Yn 1949 etholys veu avel kannas Lewisham Soth, pastel vro gwithys ganso bys dhe 1965 ha dileans an Konsel. Konseler Lavur o bys dhe vis Est 1961 pan dhaskoras a'n parti. Rag remenant y dermyn ev o konseler Livrel. Ev o ombrofyer an Livrels yn pastel vro Aberfala ha Kammbronn yn Dewisyans Ollgemmyn 1964. Ny sevis dhe'n Senedh arta.

Rekord etholansow

Etholans ollgemmyn Ruwvaneth Unys 1964: Aberfala ha Kammbronn
Parti		Ombrofyores	Raglevow	%	±
	Parti Lavur	Harold Hayman	18,847	44.5	-1.3
	Parti Gwithadorek	Robert Boscawen	15,921	37.6	+1.4
	Parti Livrel	Edmund Henry Hambly	7,559	17.9	-0.1
Majorita			2,926	6.9	-2.7
Turnout				77.6	–4.0