Arthur Ransome
| Arthur Ransome | |
|---|---|
 | |
| Genys |
18 Genver 1884  Leeds |
| Mernans |
3 Metheven 1967 Cheadle Royal Hospital |
| Trigva |
Leeds |
| Kenedhlogeth |
 Pow Sows |
| Alma mater |
|
| Galwesigeth |
jornalyas, skrifer, skrifer rag fleghes, lymner, kunteller hwedhlow a'n dus vyghan, treylyer |
| Aswonnys rag |
kevres Swallows hag Amazons |
| Tas |
Cyril Ransome |
| Pewasow |
Pewas Carnegie |
Arthur Michell Ransome CBE (18 Genver 1884 – 3 Metheven 1967) o jornalyas hag awthor sowsnek. Meur a vri ew rag skrifa’n kevres a levrow rag flghes ‘Swallows and Amazons’, settyes en Pow an Lydnow ha Norfolk. Ev a skrifas ewedh a-dro dhe Russi, kens, dres, ha woja domhwelyansow 1917. Ev a wrug rei kedhlow a-dro dhe hembrenkjsi an Domhwelyans dhe’n Servis Kedhlow Kevrinek. En kettermyn, gogrysys veu ev a vos aspyas Sovyetek gen MI5.
Bewnans a-varr
[golegi | pennfenten]Y das o Cyril Ransome (1851–1897) ha’y vabm Edith Ransome (née Baker Boulton) (1862–1944). Arthur o an kottha a bajar flogh: thera dwy hwor dhe ev, Cecily ha Joyce, ha broder Geoffrey ledhys en Kensa Bresek an Bes en 1918. Joyce a wrug dhemedhi e’n teylu Lupton, diwysyansoryon ha politegoryon. Genys veu Ransome en Leeds. Y das Cyril o professor istori en Kolji Konteth Evrek (Universita Leeds lebmyn). An teylu a wre vysytya Nibthwaite en Pow an Lydnow en venowgh. Y das a verwis kens y dermyn en 1897, ha hebm a’n tochyas der vaner vras. Adhyskys veu ev en Windermere ha woja hedna en Skol Rugby. Kas o ganjo an skolyow drefen y wolok voghes ha fowt sleyneth athletek. Ev a studhyas kemyk en Kolji Konteth Evrek.
Resegva skrifa
[golegi | pennfenten]Woja bledhen en Kolji Konteth Evrek, ev a hepkoras y adhysk, ha mos dhe Loundres rag bos skrifer. Ev a oberas avel skoodhyer sodhva en kowethyans dyllo. Y lever posek kensa o ‘Bohemia in London’ (1907). Ransome a dhemedhis Ivy Constance Walker en 1909 hag thera udn vergh dhe anjei, Tabitha. Nag o demedhyans lowen. Y wrek a venja ev dhe spena moy a dermyn genji ha’ga mergh en le skrifa. Anjei a dhidhemedhis en 1924. Ransome a dhallathas skrifa bewskrifow. Dyllys veu lever a-dro dhe Edgar Allan Poe en 1910 hag onan aral a-dro dhe Oscar Wilde en 1912. An sekond lever a gawsyas ev dhe vos e’n breuslys awos kas kabel gen Arlodh Alfred Douglas. Ev a waynyas an kas, bes an kas o tednva veur war ev tredhek mis. Woja hedna charjys veu y dhyller gen kabmdreylyans, ha fia dhe’n fo.
Jornalyas tramor
[golegi | pennfenten]En 1913 Ransome a aras y wrek gensa ha’y vergh ha mos dhe Russi rag studhya y wonisogeth. En 1915 Ransome a dhellos ‘The Elixir of Life’ (dyllys gen Methuen, Loundres), y udnik novel rag tus gowldevys. An nessa bledhen dyllys veu ‘Old Peter's Russian Tales’, kuntel a henhwedhlow dhort Russi. Woja dalla Kensa Bresel an Bes en 1914 ev a dheuth jornalyas tramor ‘The Daily News’. Thera ev owth ajon niver a hembrynkyji Bolshevik, ow komprehendya Vladimir Lenin, Leon Trotsky ha Karl Radek. Ev a vetyas an venyn neb a via y sekond gwrek, Evgenia Petrovna Shelepina. Hi a veu skrifenyades brivedh Trotsky e’n termyn na. En mis Hedra 1919, Ransome a dhug messaj posek ynter Estoni ha Russi ow kweres kres ynter an dhiw wlas. Ransome hag Evgenia eth dhe driga y’n pedncita, Reval (Tallinn) woja hebma. Ev a skrifas lever a-dro dhe dherevel lester-gwari, ‘Racundra’s First Cruise’. Woja an didhemedhyans, ev a dhemedhis Evgenia, hag anjei a dheuth dhe Bow an Sowson lebma hwrug ev oberi avel jornalyas dhe The Guardian.
Kevres Swallows and Amazons
[golegi | pennfenten]Erbydn 1929, Ransome hag Evgenia a wre triga en Pow an Lydnow drefen ev dhe ervira skrifa levrow flehes. Meur-gerys o an lever kensa, ‘Swallows and Amazons’, settyess yn Pow Lynnyn, etho ev a skrifas nebes erel e’n keth kevres ynter 1929 ha 1947.
Mernans
[golegi | pennfenten]Ransome a verwis en klavji en Manchester en 1967. Enkledhys ew ev ha’y wrek, Evgenia, en korflan eglos St Paul, Rusland, en Pow Lydnow.
Pewasow
[golegi | pennfenten]Ransome a waynyas an Medal Carnegie kensa dhort an Kowethas Lyverva rag y lever 'Pigeon Post'. Ev a gawas CBE en 1953. Dew universita, Durham ha Leeds, a ros doktouriethow onourek dhe ev. Treulyes ew y levrow dhe lies yeth, hag ema kowethasow gwerthveurheans en lies gwlas ewedh. Henwys ew planetik 6440 Ransome dh’y enora.
Oberyow
[golegi | pennfenten]- The Souls of the Streets and other Little Papers (1904)
- The Child's Book of the Seasons (1906)
- Pond and Stream (1906)
- The Things in our Garden (1906)
- Bohemia in London (1907)
- The Book of Friendship (1909)
- A History of Story-telling (1909)
- Edgar Allan Poe (1910)
- The Book of Love (1911)
- The Hoofmarks of the Faun (1911)
- Oscar Wilde, a Critical Study (1912)
- Portraits and Speculations (1913)
- The Elixir of Life (1915)
- Old Peter's Russian Tales (1916)
- A Letter to America (1918)
- Six Weeks in Russia (1919)
- Aladdin and his Wonderful Lamp in rhyme (1920)
- The Crisis in Russia (1921)
- The Soldier and Death (1922)
- Racundra's First Cruise (1923)
- The Chinese Puzzle(1927)
- Rod and Line (1929)
- Mainly about Fishing (1959)
"Dyllys woja y vernans"
- The Autobiography of Arthur Ransome (1976) (golegys gen Rupert Hart-Davis)
- The War of the Birds and Beasts and other Russian tales (1984) (golegys gen Hugh Brogan)
- Arthur Ransome's Long-lost Study of Robert Louis Stevenson (2011) (golegys gen Kirsty Nichol Findlay)
"Kevres Swallows and Amazons"
- Swallows and Amazons (dyllys 1930)
- Swallowdale (1931)
- Peter Duck (1932)
- Winter Holiday (1933)
- Coot Club (1934)
- Pigeon Post (1936)
- We Didn't Mean To Go To Sea (1937)
- Secret Water (1939)
- The Big Six (1940)
- Missee Lee (1941)
- The Picts and the Martyrs: Or Not Welcome At All (1943)
- Great Northern? (1947)
- Coots in the North (gerys heb y gollenwel)