Ralph St Vincent Allin-Collins

Kerneweger hag onan a hembronkoryon an Dasserghyans Kernewek o Ralph Saint Vincent Allin-Collins (1878 - 11 Ebrel 1948).

Genys veu avel Ralph St Vincent Allin yn 1878 yn Lewisham, Loundres dhe John Henry Allin, panner a Gernow, hag Anna Maria Richmond, myrgh brager. Pan veu bloodh, an teylu a wayas dhe dreveglos ogas dhe Boulogne, Pow Frynk. Ev a leveris na gewsi Sowsnek bys dhe dhewdhek bloodh, mes ev a dhyskas Frynkek ena.

Treylyas galwesik o herwydh niveryans 1911, ow triga ogas dhe Regent Street. Ev a dhemedhas Marie Eulalie (Julie) Mommens (1884-1951) mis Gwynngala 1915 yn Loundres. Y'n 1920ow ev a dhallathas dyski yethow Keltek. Ev a wodhya Iwerdhonek ha nebes Bretonek. Ev a lavasas ev dhe glewes an yeth Kernewek kowsys gans y deylu pan veu yowynk (kyn feu y das a Gylgh, yn Kledhbarth Kernow), ha dell wrug dyski an lavar hengovek 'This little piggy' yn Kernewek dhyworth den koth, Martin Uren y hanow (1813-1898), yn Lannergh. Yn neb kas ev a dhyskas Kernewek dhe glass yn Loundres. Allin-Collins a ynias war an yeth kowsys yn y glass, ow previ y vos possybyl der y ensampel y honan.

Yn 1927 ev a dhyllas 'A Cornish Grammar' . Y'n gwettha prys, breusys veu y lyver awos bos kammgemeryansow ynno. Ev a skrifas niver a hwedhlow berr rag paperyow nowydh kepar ha'n St Ives Times, Bodmin Guardian ha'n Western Weekly News, ha dyllys veu nebes hwedhlow berr ganso y'n lyver 'An Den ha'y Dheu Wreg' golegys gans Robert Morton Nance. Gwrys avel bardh Gorsedh Breten Vyghan 10 Gwynngala 1928 gans an hanow bardhek Hal Wyn, hag ena yn 1933 enorys veu avel bardh Gorsedh Kernow der apposyans gans an keth hanow bardhek Hal Wyn.

Synsys yw moy a dhyllansow ganso yn Lyverva Kenedhlek Kembra, dedhyes 1928, kepar ha 'Clappiansow an Treghas Treus' ha 'Davydd Trewortha ('An improbable tale of love and war')' . Halwyn a skrifa lytherow dhe verdh erel owth usya aga henwyn bardhek kepar ha 'Bras y Golon' (William Benjamin Tregoning Hooper), kyns y vos degemeres dhe'n Orsedh hogen. Ev a skrifas lies erthygel dhe baperyow nowydh Kernow, kepar ha'n St Ives Times, Cornish Guardian ha Western Morning news ynter 1930 ha 1934.

Herwydh Tim Saunders yn The Wheel, devynlyver prydydhieth Kernewek, Halwyn a serras Robert Morton Nance ha tus erel a vri y'n Dasserghyans. I a leveris orth golegydhyon bos y Gernewek heb awtorita.

Allin-Collins a verwis yn Klavji Tooting Bec 11 Ebrel 1948.