Phoebe Morton Nance

Phoebe Mary Morton Nance (2 Hedra 1912 - 16 Meurth 2007) o skrifer, prydydh hag ilewydh Kernewek.

Hi o an tressa flogh dhyworth eyl dhemedhyans Robert Morton Nance. Hy mamm o Annie Maud neé Cawker. Yth esa dew vroder leun gensi ha hwor dhyworth demedhyans kynsa hy thas. Pan veu hi yowynk, hy thas a dhyskas Kernewek dhedhi, ytho hi o martesen an kynsa flogh dhe vos freth y'n yeth a-dhia kans bledhen ha moy. Yn 1932, hi a veu berdhys gans Gorsedh Kernow, onan a'n re kynsa herwydh apposyans y'n yeth, owth usya an hanow bardhek Morwennol . Aswonnys veu avel kowser freth y'n termyn kyns Nessa Bresel an Bys. Yn 1938 hi a dhemedhis Willmott Ayton Procter yn Eglossenor, mab dhe'n artydhyon a Bennsans Ernest ha Dod (Doris) Procter, ha skrifwas oberow.

Hi a gevrannas niver a skrifow ha kanow dhe'n lyver termyn Kernow y'n 1930ow, mes saw diw gan re dreusvewas bys hedhyw, hemm yw: Pyu a Wor an Den a-Garaf?, hag An Gwaynten. Diskudhys veu an dhiw gan yn paperyow hy thas yn Lyverva Courtney, Truru. Dyllys yns i yn kuntel-lyver The Wheel, golegys gans Tim Saunders. Hi a skrifas erthyglow dhe baperyow nowydh kepar ha'n Western Morning News, Daily Sketch ha West Briton yn-dann an fughanow 'Cornishwoman'. Yn 1934 erthygel skrifys gensi yn Kernewek a veu dyllys y'n dhew baper kynsa na. Hi a wor seni'n krowd, ow performya Can an Balores dhe'n Guntelles Geltek yn 1932.

Hy gour a verwis yn 1963, mes hi a besyas triga yn Kernow, ow merwel yn Pennsans yn 2007. Hi re beu bardh 74 bledhen, rekord dhe Orsedh Kernow. Ynkleudhys yw an dhew yn korflan Eglossenor ogas dhe'y thas.

Henwys veu Phoebe Procter avel ynspiryans dhe albom Gwenno, Tresor.