Myghal Palmer

Michael Charles Palmer, po Myghal Palmer (22 Hwevrer 1936 – 20 Hedra 2005) o novelydh y’n yeth Kernewek.

Genys veu Myghal Palmer yn Porth Dewnans yn 1936, an yowynkka a dhew flogh dhe Reginald W L Palmer hag Elizabeth M L Grose. Y das o klorek arghantti. Adhyskys veu yn Kolji Aberplymm, ow kwaynya an Pewas Sowsnek. Ev a warias yn lies drama radyo dhe’n BBC. Rag servis kenedhlek ev a viajyas dhe Irak, Jordan ha Koberenys. Awosa ev a viajyas dhe lies rann a’n bys gans y deylu.

Yth eth dhe Golji Pennvro yn Pennskol Rysoghen rag studhya lagha. Mes wosa ev dha asa Rysoghen, ev a sewyas y das dhe oberi yn Arghantti Lloyds. An brassa rann a’n termyn ev a oberi yn Bristol ha Taunton, mayth o trigys war-barth ha'y wrek, Margaret ha’ga diw vyrgh. Da o ganso kerdhes, hag ev a gerdhes lies trolergh hir ow komprehendya an Hyns an Pennines ha Trolergh Arvor Kernow.

Yth esa bern dhodho ow tochya y aghskrif, ha’y wreydhyow Kernewek a gentrynnas ev dhe dhyski Kernewek. Ev a dhallathas dyski Kernewek dre gors kesskrifans ‘Kernewek Dre Lyther’. Enorys veu avel bardh an Orsedh der apposyans yn 1986 yn Lannwedhenek gans an hanow bardhek Perghyryn.

Myghal Palmer a skrifas peswar a’n pymp novel kynsa skrifys yn Kernewek. Ev a skrifas lies hwedhel berr hag erthyglow rag lyvrow termyn ynwedh, keffrys ha nebes bardhonieth. Pur dheskrifus o y skrifow, didhanus treweythyow, trist po euthyk termynyow erel. Ev a waynyas pewasow an orsedh keniver tro, y feu govynnys dhodho sevel orth kesstrifa rag ri chons dhe dus erel.

Palmer ynwedh o gwarier naturel ha gallosek, a dhyskas y eryow yn ferfydh. Ev o kuv ha gweresek dhe dhyskoryon erel. Ev o esel a’n bagas 'Agan Tavas'.

Ev a verwis a ganker 20 Hedra 2005

Rol a nebes gwriansow gans Myghal Palmer

Skrifys yn Kernewek Unys marnas Dyvroans (Unys Amendys)

Bledhen	Hanow	ISBN	Furv
1986	Enys Ancow	0 9535975 1 2	Hwedhel berr
1989	Jory	978 0 9548451 6 2	Prederys yw gans lies Kerneweger y vos an gwella novel skrifys yn Kernewek. Wosa mernans y gerens, Jory a wayas dhe driga gans y ewnter.
1993	Hwedhlow Euthekter	0-907064-34-5	Hwedhlow berr
1993	Moy Hwedhlow Euthekter	0-907064-40-X	Hwedhlow berr
1998	Dyvroans (Ystory Tylu Kernewek)		Novel - stori den bal a Gernow a dhyvroas dhe Ostrali. Selyes war istori teylu Myghal y honan.
1999	An Kaskyrgh Diwettha	1-899342-41-9
2001	Rebellyans	978 0 9564234 0 5	Novel - fuglien skiens
2004	Godros	0 9548451 0 2	Novel - Lyver fantasi skiens
	Tu aral an Norvys ha Whedhlow Erel	978 0 9548451 7 9	Pymp hwedhel berr gans Myghal Palmer ha dew gans Heather Ashworth
	Whethlow wosa Tewlder	978 0 9548451 9 3	Naw hwedhel berr
2009	Hwedhlow a-dhiworth An Orsedh	978 1 899342 61 7	Ev a gevrannas dew hwedhel berr