Henry Bone

Henry Bone
Henry Bone
Genys	6 Hwevrer 1755 ; Truru
Mernans	17 Kevardhu 1834 ; Loundres
Kenedhlogeth	Kernow
Galwesigeth	lymner, lymner priweyth
Soodh	lymner lys
Gis	portrayans
Eseleth	Akademi Riel Artys

Henry Bone (6 Hwevrel 1755; 17 Kevardhu 1834) o lymner kernewek a owmel, arvethys gen tri matern an eyl woja y gila, Jori III, Jori IV ha Wella IV. En y resegva a-varr, ev a oberas avel lymner priweyth ha gebmweyth. Etholys veu avel Akademydh Riel, hag ev a askorras an lymnyansow owmel moyha besketh gwelys bys an termyn na.

Bownans hag ober

Genys veu Henry Bone en Truru, Kernow. Gwrier mebel o y das ha kervyer skiansek. En 1767, teylu Bone a removas dhe Plymouth en Dewnan lebma hawas Bone kynsernieth en 1771 dhe William Cookworthy, fondyer gweythva priweyth Plymouth ha'n gwrier kensa en Pow an Sowson a briweyth kalish. En 1772, Bone a removas gen y vester dhe weythva priweyth Bristol, lebma hwrug remaynya hwegh bledhen, owth oberi a-dhia 6 mettinweyth bys 6 godhuherweyth, ha studhya delinyans woja hedna.

Woja skattyans gweythva Bristol en 1778, Bone a dheuth dhe Loundres gen udn gyni en y bocket, ha pymp peuns chevisys dhort koweth. Ev a dhallathas owmelya euryoryow hag ena portrayansow owmel ha dowrliw. 24 Genver 1780, ev a dhemedhas Elizabeth Vandermeulen, diyskywnyas a'n lymner meur y hanow Adam Frans van der Meulen. An kopel a gavas dewdhek flogh, ha deg anodhans a dreusvewas dhe vos kowldevesigyon. En 1780 ev a dhiskwedhas y lymnans kensa y'n Akademi Riel, portrayans a'y wreg hag owmel meur dres ehen rag an termyn na. A-dhia an vledhen na, ev a wrug omri ne tien dhe lymna owmel ha diskwedhes e'n Akademi.

En 1789, ev a dhiskwedhas "Awen ha Kupid", an lymnans owmel moyha gwres besketh bys ena. En 1800 apoyntys veu avel lymner owmel dhe Bednsevik Kembra. En 1801 gwres veu avel kowethyas an Akademi Riel ha lymner owmel dhe Jori III, apoyntyans senjys ganjo dres rewlyansow Jori IV ha Wella IV. 15 Ebrel 1811 etholys veu avel akademydh riel. Y askorrans owmel Bacchus hag Ariadne (woja lymnans gen Titian) o an lymnans owmel moyha askorrus besketh. Moy ages 4,000 a dus a welas an ober en chei Bone. Gwerthys veu dhe Mr. G. Bowles a Cavendish Square rag 2,200 gyni. An somm a veu talvedhys gen checken Arhanti Fauntleroy. Bone a wrug kashya an checken war y vor' tre, e'n gwella pres, drefen an arhanti dhe vos skat an nessa dedh.

Bone a wrug kevres a bortrayansow istorek dhort termyn Elisabeth I, kevres a "Vaternydhyon a vri e'n Vresel Vredereth", ha kevres a bortrayansow a deylu Baron Russell. Na veu an kevres sowyn. En 1831 y wolok a fyllis. En anvodhek ev a gemeras y bensyon.

Ev a verwis 17 Kevardhu 1834. Leverys ew y vos "den a glorder ha helder gnasek; y vownans privedh veu afinys gen kowethegeth hag ewnhynseth". Francis Chantrey a gervyas pedndhelow nodho, ha John Opie, John Jackson, ha George Harlow oll a lymnas y bortrayans.

Kemmynro

Neb termyn kens y vernans, Bone a brofyas y guntel, talvesys ort £10,000, dhe'n genedhel rag £4,000, bes deklinys veu an kydnyk. 22 Ebrel 1836 anjei a veu gwerthys en strifwerth Christie's, hag etho skollys a-les. Gwerthasow erel a'y oberow a hwarva en 1846, 1850, 1854, ha 1856.

Teylu

Dew a'y vebyon, Henry Pierce Bone ha Robert Trewick Bone, o lymnoryon owmel a vri ewedh. Mab aral, Thomas Bone, o prentis marner war skath henwys Racehorse a veu diswrys ha beudhi ogas dhe Enys Manow. Onan aral, Peter Bone, o isgapten e'n 36s Rejyment, ha goliys en Batel Toulouse en 1814, ha merwel skon woja dehweles dhe Bow an Sowson. Pympes mab eth ha bos laghyas.