Edwin Chirgwin
Edwin Chirgwin, Map Melyn (6 Ebrel 1892 - 11 Du 1960) o dyskador, prydydh ha bardh Gorsedh Kernow.
Genys veu 6 Ebrel 1892 en Lulyn, an kensa a bymp flogh dhe Edwin Chirgwin (1863-1925) ha Catherine Jane Collins (1864-1926). Kunteller tollow o ober y das (ha meliner kens hedna). Trigys enjei en Trewordhavow, en Pluw Bowl.
Woja gara skol, Chirgwin a dheuth dyskador darbarer e'n skol leel. En 1913 ev eth dhe dheski en Skol Mebyon Porthia, bes ev a wrug omjunnya Troslu Skav Dug Kernow (Sowsnek: Duke of Cornwall's Light infantry) en 1914. Ev a servyas avel sineller en Eynda ha'n Est Kres bys dhe fethans an Turkys en 1917. 1/4a Battalyon an DCLI eth dhe Eynda e'n lester Assaye en Hedra 1914, mos dhe Aden en mis Genver 1916, hag Ejyp ha Palestin en mis Genver 1917. Thera dhe Chirgwin skians meur a'n Bibel, etho an batelow koneryek a veu pur galish drefen bos oll an henwyn telleryow mar aswonys dhe ev.
En mis Efan 1924 ev a dhemedhas Elizabeth Dorothy Thomas (1901-1981) en Pennsans o bardhys hy honan en-dadn an hanow bardhek Gwreg Map Melyn
A-dhia 1926 dh'y omdednans en 1956 ev o pedndyskader Skol Ryskarasek (St Cleer). Ev a wre deski Pader an Arlodh ha Kredo an Aposteleth dhe dheskyblon an skol. En y dermyn difresek, ev a skrifa ow tochya an termyn eus passyes en Kernow,pekar ha lien gwerin, hwedhlow leel, yeth, bardhonieth hag istori. Ev a gevradnas dhe baperyow nowydh ha levrow termyn en venowgh, aretha, skrifa levrigow a-dro dhe'n tavas Kernowek, ha treylya tekstow kryjek pekar ha hymnys ha levrow an Bibel. Ensamplow a'y skrifow ew One Thousand Place Names of Cornwall ha Yn Kernewek Lavar E! (Say it in Cornish - en prynt hwath).
Chirgwin a veu gwres bardh a Orsedh Kernow en 1932 en Dons Maen, Pluwveryan, gen an hanow bardhek Map Melyn. Ev o Skrifednyas an Orsedh tredh 1944 ha 1960 ha kens henna, Kannas an Orsedh. Y noy, John Jenkin, o Skrifednyas an Orsedh 1992-2001.
Edwin Chirgwin a redyas pregoth e'n kensa servis senjys en Kernowek a-dhia 1678 en Eglos Tewydnek en 1934. Herwydh Peter Berresford Ellis, ev o an gwella a brydydhyon Kernowek arnowydh oll, gen kanow pekar hag An Jynjy gesys dhe goll, Den Hanternos, An Velin Goth, Gorthewer ha Ro dhymmo-vy dha dhorn.
En Sekond Gwerryans an Bes, thera Chirgwin en Jibraltar. Ev a gesskrifa ort A.S.D. Smith (Caradar) hag erel en Kernowek. Degemerys veu Kernowek gen an censoryon kasorek (feth a veu merkys gen paper nowydh an West Briton).
Edwin Chirgwin a verwis 11 Du 1960 en Truru.
Ma an erthygel ma usya an Furv Skrifys Savonek a-barth Kernowek diwedhes.