Ann Trevenen Jenkin

Ann Trevenen Jenkin
Leshanow	Bryallen
Genys	14 Ebrel 1930  Borgh Loundres Barnet
Mernans	8 Ebrel 2024  Trelidys
Kenedhlogeth	Ruvaneth Unys
Galwesigeth	skrifer, gweythresydh gonisogethel, Bardh, prydydh, dyskador, gweythresydh yeth, lyveryas
Soodh	Bardh Meur
Parti Politek	Mebyon Kernow
Pries	Richard Jenkin
Fleghes	Loveday Jenkin
Eseleth	Gorsedh Kernow, Kowethyans Lyvervaow Skol, An Guntelles Keltek

Ann Trevenen Jenkin, genys Dorothy Ann Trevenen, (14ves Ebrel 1930 - 8 Ebrel 2024) o an kynsa benyn ynstallys avel Bardh Meur yn Kernow hag y'n bys Keltek oll ha dewdhekves Bardh Meur Gorsedh Kernow (1997-2000). Dyskador, skrifer, lyveryas ha gweythresydh a-barth kenedhlogeth Kernow o hi. Esel-fondya Mebyon Kernow o hi hag y lewydh der enor a 2011 bys yn hy mernans. Bryallen yw hy hanow bardhek.

Bewnans a-varr

Jenkin a veu genys dhe'n 14ves Ebrel 1930 yn Barnet, Hertfordshire, dhe das John Arnold Trevenen, laghyas a Gernow, ha mamm Dorothy Goldsmith, a Wlas an Hav. Yn 1932 an teylu a vovyas chi dhe Resrudh. Adhyskys o hi ena hag, yn Nessa Bresel an Bys, yn Skol Nessa Mowysi Truru avel annedhyas. Hi a studhyas Sowsnek yn Pennskol Karesk, gul kors trenya dyskadoryon gans an Fondyans Adhyskans a Bennskol Loundres ha dyski Sowsnek yn Evesham, Worcestershire.

Hi a dhyskas yn Skol Ramasek Mowysi Kammbronn a'n 1970ow bys pan wrug hi omdenna yn 1987. Lyveryas skol o hi ha servya ynwedh avel kaderyer Kowethyans Lyvervaow Skol Kernow. Yn-mes a'y ober yn skolyow, hi a dhyskas "Cornish for fun" ha Kernewek rag apposyansow Testskrif Adhyskans Nessa. Gans gweres an Awtorita Adhyskans Leel hi a fondyans Studhyansow Kernewek rag Skolyow.

Mebyon Kernow

Dre hy heniter nessa Helena Charles, y'n 1950ow y teuth ha bos gans bern yn movyans Kernow ha Kernewek.

Jenkin a veu onan a'n 13 esel-fondya a Vebyon Kernow yn Ostel Temprans Oates yn Resrudh dhe'n 6ves Genver 1951. Ena ynwedh yth esa hy fries a dheu Richard Jenkin ha Helena Charles. Omvyskys o hi yn feur gans Mebyon Kernow remenant hy bewnans, ow tos ha bos y lewydh der enor yn 2011 bys yn hy mernans yn 2024.

Kernewek ha Gorsedh Kernow

Y'n 1950ow Jenkin a studhyas Kernewek gans Robert Morton Nance yn Porthreptor. Berdhys veu hi yn 1957 orth Krows Predennek, Eglosvelyan, drefen sleyneth yn Kernewek, gans an hanow bardhek Bryallen. Henwys veu hi avel Kannas an Bardh Meur yn 1994 ha Bardh Meur yn 1997-2000. Ynwedh, hi a veu styward, skrifenyas kesstrifow, breusyas kesstrifow, karderyer isvagas Kovadhow ha Dyllansow a-dhia 1994 hag yn kessedhek Holyer an Gof a-dhia 1994.

Esel Skorren Kernow a'n Guntelles Keltek o hi a-dhia 1950. Yndelna,hi a synsas an sodhow a skrifenyas, sodhek an wask, kaderyer, islewydh, hag, a-dhia 2006, lewydh rag bewnans.

A 1994-2006, hi o kevarwodher Keskerdh Kernow, hag a restras Keskerdh Kernow 500, daswrians a'n keskerdh a Lannaghevran bys yn Loundres yn Omsav 1497. Hi a restras an keskerdh y honan, keffrys ha bos rann an iskessedhek rag adhyskans. Jenkin a gerdhas an hyns dien a 365 mildir (587km) dres 29 dydh, gans hy hi Brengi. Yn 2003, hi a skrifas dew lyver berr rag fleghes yn kever Brengi ha'y viaj, The Dog that Walked to London hag An Ky a Gerdhas bys dhe Loundres. Ynwedh, onan a'n skriforyon a Cornwall Marches On o hi.

Rann bosek a Gessedhek Milvledhen Kernow a 1999 dhe 2003, y'n kessedhek leun hag an iskessedhek golegydhek. Hi a weresas gans hwithra ha skrifa lyver an vilvledhen Cornwall for Ever/Kernow Bys Vykken hag a veu res dhe bub fogh skol yn 2000.

Yth o hi kaderyer a Dhehwelans yn 2002, an kynsa dehwelans tre rag an keskar yn Aberfala. Iskaderyer o hi rag an nessa yn 2004 ha esel an kessedhek rag 2008.

Yn 2024, apperya a wrug hi ha'y myrgh Loveday yn towlen BBC Radyo 4 Last Word.

Bewnans Personel

Hi a dhemmedhis gans Richard Jenkin yn 1956 yn Eglos Sen Uni yn Resrudh. I a skrifas meur a lytherow yn Kernewek an eyl dh'y gila ha studhya an yeth warbarth yn Pennskol Karesk. Yn kynsa, trigys ens i yn Totnes, ena Trelids yn Pluw Grewen wosa 1959. Ena i a dhallathas dyllo lyver-termyn New Cornwall bys yn 1973. Yth esa dhedha peswar flogh: Morwenna (1957), Loveday (1959), Gawen (1963) ha Conan (1969).

Bew o hi yn Trest Ertach Kernow ha'y drester rag 18 bledhen; tasek o hi a Drest Hypatia. Hi a veu bodhek rag Gwithti Hellys, esel bew a'y Fondyans Benenes leel yn Trelids ha negesydh ranndir a-barth an Gidyoresow.

Hi a verwis dhe'n 8ves Ebrel 2024 yn hy chi yn Trelids, 93 hy bloodh.

Dyllansow

• Lyver-termyn New Cornwall (1960-73, gans Richard Jenkin)
• Cornwall the Hidden Land (1965, gans Richard Jenkin)
• Leedstown School 1878-1978 (1978)
• Leedstown in our Lifetime: The Story of a Cornish Village (1994)
• Gwel Kernow (A Cornish View) (1997)
• Notes on the Prayerbook Rebellion (1999)
• Madron's Story (2001)
• The Dog who Walked to London (2003)
• An Ky a Gerdhas bys dhe Loundres (2003, treylys gans Vanessa Beeman)
• Crygyon Kernow Ogas ha Pell (Cornish Ripples Near and Far) (2005)
• Steren an Colyn Kernow (Steren the Cornish Puppy) (2008, gans Conan Jenkin)

Devynnow

Bleynyes gans: Cummow

Bardh Meur 1997–2000

Holyes gans: Jowan an Cleth