Usvil

Ujvil
	Ujvil breghys (Crocuta crocuta) en Park Kenedhlek Queen Elizabeth, Ouganda
Klassans bewoniethek
Gwlaskor:	Animalia
Fylum:	Chordata
Klass:	Mammalia
Urdh:	Carnivora
Teylu:	Hyaenidae; Gray, 1821
Isteylu:	Hyaeninae Usvil breghys (Crocuta crocuta); Usvil brith (Hyaena hyaena); Usvil gell (Hyaena brunnea); ; Protelinae Usvil dor (Proteles cristata); ;

Teylu a gigdebroryon ew an ujviles (usvil e'n FSS (Kres)), gwres a beder eghen. Haval ort kathes en filogenynnek, bes ort keun hag a radn aga semlant hag omdhegyans, ujviles a drig war an nor, ow ponya rag kachya aga boos. Esplegya a wrug ujviles nanj ew 22 milvil vledhen. Nanj ew 15 milvil vledhen, radna a wrug ujviles dhe dhew isteylu, Protelinae, haval dhe geun byghan, a dheber termytow (ha terweythyow hwesker erel), ha'n Hyaeninae, a dheber eskern, karyn ladhys gen enevales erel pekara lewyon ha lewpardes, po ladhys ganja aga honan. An ujvil breghys en arbednek ew helghor da, hag anjei a wra helghya avel unigyn, po en bagasow byghan ha meur.

Ujvil dor

An ujvil dor ew an udnik esel a'n isteylu Protelinae. Ma anjei ow triga en Afrika Dhyghow hag Est. Termytow ew y voos, herwydh usadow, bes terweythyow hwesker erel. Nag uji ujviles dor ow tebri kig nevra. Gwell ew ganja pryskdir ha gwelstir, a-der menedhyow. Y hanow en Sowsnek, aardwolf a styr 'dor-vleydh' e'n yeth Afrikaans

Ujvil breghys

Ema adro dhe 45,000 a ujviles breghys en Afrika. Ev ew an brassa esel a'n teylu. Kigdebror pur sewen ew an ujvil breghys, hag anjei a ell kesstrivya gen lewyon rag aga freydh. Ma anjei ow triga en gwandrans efan a vewvaow, koswigow, gwelstiryow ha menedhyow, nebes citys hwath.

Ujvil brith

Ema en-dadn 10,000 a ujviles brith ow triga hwath en Afrika Gledh hag Asia West. Ma anjei ow kudha en kovva dydhweyth, ha dos en-mes rag boosa nosweyth. Ma anjei ow tebri karyn, bes ewedh, frooth ha hwesker pan vo chons.