The Hitchhiker's Guide to the Galaxy

The Hitchhiker’s Guide to the Galaxy (Gidlyver Gwandrer an Galaksi) yw bagas a romansow, towlennow radyo ha pellwolok, ha gwariow fugieth skiensel komedi skrifys gans Douglas Adams.

An kynsa bagas a hwegh towlenn radyo a veu darlesys gans BBC Radio 4 yn 1978. Yth o an kynsa komedi radyo gans son dewblek ha meur a arghans a veu devnydhys rag sonyow dramasek hag ilow. An dowlenn a dhegemmeras meur a brays diworth goslowysi, ha nessa bagas a hwegh towlenn a veu darlesys yn 1980.

An towlennow radyo a veu desedhys rag gwariva yn 1979 ha rag pellwolok (darlesys gans BBC 2 yn 1981).

An romansow a veu skrifys gans Adams ha dyllys y’n blydhennow ma:

The Hitchhiker’s Guide to the Galaxy (1979)

The Restaurant at the End of the Universe (1980)

Life, The Universe and Everything (1982)

So Long, and Thanks for All the Fish (1984)

Mostly Harmless (1992)

Wosa mernans Adams (2001) an BBC a dhesedhas an diwettha romansow rag radyo. An towlennow nowydh a veu darlesys gans BBC Radio 4 ynter 2004 ha 2018. Ynwedh, awtour iwerdhonek Eoin Colfer a skrifas an hwegves romans And Another Thing… hag a veu dyllys yn 2009.

Versyon fylm sinema a veu gwrys yn 2005.

Deskrifans an Hwedhel

Arthur Dent yw Sows anfeusik neb a drov bos res dhe dhistrui y ji rag drehevel fordh nowydh.

Ford Prefect, koweth Arthur, a dhispleg orto “nyns ov vy diworth Guildford, yn hwir. Yth ov vy diworth planet byghan neb tyller yn kerghynn Betelgeuse.” Ford yw hwithrer rag an Gidlyver (lyver elektronek gans skiens bras yn kever planetys ha tus an galaksi, hag an geryow Don’t Panic skrifys war y worher). Ford a dhispleg y fydh oll an Norvys distruys, hedhyw, rag drehevel fordh ynterster nowydh.

Ford a wra sawya Arthur hag y honan hag i a wra metya Zaphod Beeblebrox (kenderow Ford ha Lewydh an Galaksi) neb re ladras an sterlester Heart of Gold. Yma Trisha “Trillian” McMillan (godhonydhes diworth Loundres neb a metyas Zaphod dhe gevewi), hy diw logosenn, ha Marvin (robot gans amovyansow ha newrosys den) dhe Heart of Gold ynwedh.

An sterlester yw arbrov a yll vyajya dhe dylleryow nebes onpossybyl hag i a wra kavoes Magrathea (planet hag yw krysys bos myth) ha metya Slartibartfast (pennser a'n para a dhesinyas an Norvys) neb a dhispleg orta nebes gwiryonedhow a-dro dhe’n Norvys, an logos, ha gorthyp an Govynn Finek a-dro dhe vewnans, an univers, hag oll (hag an govynn y honan).

Yn Gonisogeth Werys-da

Hanow an wiasva treylyans Babelfish yw hanow eghenn pysk byghan y'n hwedhel a yll treylya yethow oll pan yma yn skovarn nebonan.

An hanow Deep Thought (hanow jynn-amontya bras y'n hwedhel) a veu devnydhys rag kynsa hanow jynn-amontya goedhboell Deep Blue.

Paranoid Android, kan skrifys gans Radiohead, yw deskrifans Marvin diworth an towlenn ha romans.