Sky Brown

Sky Brown
Genys	7 Gortheren 2008  Miyazaki
Kenedhlogeth	Ruvaneth Unys
Galwesigeth	rosteller, mordardher
Ughelder	1.54 Meter
Sportys
Gwlas sport	Ruvaneth Unys

Sky Brown (Nihonek: スカイ・ブラウン) yw rosteller bretennek-nihonek neb a gesstrif rag Breten Veur. Hi yw an yowynka rosteller galwesik y’n bys, ha hi a waynyas an dowlen bellwolok amerikanek Dancing with the Stars: Juniors ynwedh. Pan hi o dewdhek bloodh, dewisys veu hi dhe representya Breten Veur y'n Gwariow Olympek Hav 2020, le may hwrug hi gwaynya medalen vrons.

Bewnans personel

Sky Brown a veu genys yn Miyazaki, Nihon. Hy mamm, Mieko, yw nihonek, ha'y thas, Stuart, yw bretennek. Y'n yeth Nihonek, hy hanow yw leveris 'sukai', ha kepar ha'y hanow teylu, skrifys yw yn system kana yn unnik, dell yw usys rag henwyn nag yw henwyn nihonek hengovek.

Hy thas predennek a veu trygys y’n Statys Unys nebes bledhynyow, kyns gwaya dhe Nihon. Trigys yw Brown yn Miyazaki, mes hi yw trigys hwegh mis pub bledhen y’n Statys Unys. Hy theylu yw rostelloryon, hag yn hy hynskol, yth esa park-skesya. Lemmyn yma ledrynn-skesya dhedhi yn hy lowarth a-dhelergh, drefen an fowt a barkow skesya yn ranndir Miyazaki. A-der rostella, yma bern dhe Brown a vordardha, ha hi a wra sevel dhe 5 eur myttinweyth rag mordardha, herwydh usadow.

Resegva

Nyns eus dyskador skesya dhe Brown. Yn y le hi a dhysk kastys nowydh dhyworth YouTube. Treweythyow hi a wra omassaya gans Shaun White, neb a waynyas medalennow olympek rag erghvordya. Skoodhys yw Brown gans Nike ha hi yw an athlet yowynka y'n bys yw skoodhys gansa. Hi a apperyas yn argemmynow Nike gans Serena Williams ha Simone Biles. Skoodhys yw hi gans Almost Skateboards ha Skateistan ynwedh. Yma dres 602,000 a holyoryon Instagram dhedhi ha kevys yw hy gwydhyowyow dres 29 milvil golok war YouTube. Pan o hi deg bloodh, Brown eth ha bos athlet galwesik, ytho hi o an rosteller galwesik yowynka y’n bys.

Yn 2016, pan o hi eth bloodh, Brown a gemeras rann y'n Vans US Open, an yowynka dhe gesstrivya ena. Hi a godhas dhyworth hy rostell y'n rag-kesstrif. Yn 2017, hi o nessa y’n bennwari brastiryel asiek, ha hi o yn-mysk an deg ughella y'n Vans Park Series yn 2018. Yn 2018 hi a waynysas an dowlen bellwolok amerikanek Dancing with the Stars: Juniors ynwedh.

Yn mis Hwevrel 2019, hi a waynyas an kesstrif Simple Session yn Tallinn, Estoni. Yn mis Meurth 2019, Brown a dhekaryas hy dhe gesstrivya rag Breten Veur, wosa leverel hi dhe gesstrivya rag Nihon a-gynsow. Brown a leveris dell yw gwell gensi “fordh dhiskwithys” an British Skateboarding Association. Yn 2019, Brown o tressa y’n World Skateboarding Championship ynwedh, ha hi eth ha bos an kynsa benow tira 540 a-rag y’n X Games. Hi o pympes y’n kesstrif rostella X Games. Brown o tressa y’n 2020 Park World Skateboarding Championships yn Brasil.

Brown o onan yn-mysk pymp brython neb a assayas kwalifia rag rostella y’n Gwariow Olympek Hav 2020, pan veu komprehendys rostella y'n gwariow an kynsa prys. Yn 2020, an 28ves mis Me, ha hi trenya yn Kaliforni, hi a godhas yn “euthyk” dyworth ledrynn hanterpib, hag yth esa nebes torrow war hy krogen benn ha'y honna bregh ha dorn kledh o terrys dhedhi. Hi a veu neyjys dhe glavji ha leveris veu na veu hi ow korthebi pan dhrehedhas. Hy thas a leveris a-wosa hy bos “feusik dhe vos yn fyw”, ha Brown hy honan a leveris dell veu hemma hy hodh gwettha hwath. Byttegyns, hi o ervirys hwath dhe herdhya an oryon ha kesstrivya rag owr y’n Gwariow Olympek yn Tokyo. Yn 2021, yn mis Ebrel, Brown a leveris dell esa hi ow prederi hwilas kesstrivya avel mordardher y’n 2020 Gwariow Olympek delatys.

Yn mis Metheven 2021, Brown a veu dewisys dhe representya Breten Veur rag rostella y’n Gwariow Olympek Hav. Brown yw an yowynka athlet olympek bretennek yn gwariow hav bythkweth, dhe 13 bloodh, yowynka ages Margery Hinton, neb o 13 bloodh ha 43 dydh pan wrug hi neuvya y'n kesstrif neyj bron 200 meter y’n Gwariow Olympek Hav yn 1928. Nyns o Brown an yowynka kesstriver y’n Gwariow, drefen bos an gwarier tennis moos syriek Hend Zaza ha'n rosteller nihonek Kokona Hiraki yowynka ages Brown. Yn mis Gortheren 2021, hi a waynyas an vedalen owr benow rag pitch rostella X Games. Brown a waynyas an vedalen vrons y'n kesstrif rostella y’n Gwariow Olympek Hav yn 2020, ha hi eth ha bos an gwaynyer yowynka a vedalen rag Breten Veur, 13 bloodh ha 28 dydh hy oos.