Mina Dresser

Wilhelmina Stratton (1937-2024), aswonnys dhe Gernowogyon avel Mina Dresser, o Kernowes ha bardh Gorsedh Kernow.

Genys veu yn Porth Ia, an eyl a dhiw vergh genys dhe John Stratton hag Emmeline, née Paynter. Lewyer kertys o hy thas.

Hi a entras dhe Servis Kanasedh an Pow dre apposyans. Spenys veu rann vras a'y bewnans yn powyow pell, yn Afrika, China hag Amerika Soth. Yn 1961 hi a dhemedhis dhe Clive Dresser, kannas y'n keth servis. Yth esa mergh ha mab dhedha, Hilary ha Guy. Hilary a gesstrifas yn kesgwlasek a-barth an Ruvaneth Unys avel kanouyores wyb, ow trehedhes hanter-finel an K-4 500 m yn Gwariow Olympek Barcelona yn 1992. Guy a gesstrifas avel kanouyer marathon yn diw gampyorieth an Bys, yn 1988 y'n kesstrif K2 (42km) hag yn 1991 y'n kesstrif K4 (10,000 m).

Mina a wodhya dhe glappya lies yeth, kepar ha Spaynek, Frynkek, Kechwa, Mandarin ha moy hwath. Nyns o marth, ytho, hi dhe dhyski Kernewek wosa omdenna an Servis Kanasedh ha dos tre dhe'n pow. Hi a dhyskas gans Richard Gendall, ha klappya a-dro dhe vusik ganso ynwedh. Hi a wodhya dhe wul musik yn ta, gwari an piano ha kana gans lev kontralto fin. Yth esa an kaner bariton Benjamin Luxon y'n keth klass skol gensi.

Pur weythresek o hi yn Cussül an Tavas Kernôwek, ha hi a dhallathas klassys yn Kernowek Diwedhes yn Chi Murdoch a tylleryow erel. Rag an hwel bras ma ha'y skrifa Kernewek, hi a veu berdhys y'n vledhen 2008, ha'n hanow bardhek Merh Hellesveor.

Moyha aswonnys yw hi martesen dhe Gernowegoryon erel rag hy skrifa. Kuntellys yw pump a'y hwedhlow y'n kuntel-lyver Hwedhlow a-dhiworth An Orsedh, hag usys veu niver anedha yn apposyansow Kesva an Taves Kernewek dres an bledhynnyow. Hi a waynyas pewas an Gwrys Kernewek yn 2005. Hi a res lies areth dhe guntellesow benenes ha chapel dres an bledhynnyow.

Hi a godhas tre yn Mis Ebrel 2024, ow therri rann a'y asow. Hi a verwis 24 Metheven 2024.