Kashtin

Dhyworth Wikipedya, an godhoniador rydh
Jump to navigation Jump to search
Florant Vollant
Kaner-skrifer Innu Florent Vollant ow performya y'n Lowarth Losowek yn Montreal yn Mis Hedra 2006

Duo rokk-gwerin a Ganada o Kashtin y'n 1980ow ha 1990ow. I veu unn a'n bagasow ilow moyha sewen hag a vri a'n Kenedhlow Kynsa.

Resegva[golegi | pennfenten]

Furvyes veu an bagas yn 1984 gans Claude McKenzie ha Florent Vollant, dew ilewydh Innu a Maliotenam ryb an Avon Saint Lawrence yn Kebek. Styr an hanow Kashtin yw "herdhwyns" y'n yeth Innu-aimun, mes y'dhewisys drefen an lavaren Sowsnek "cashed in". Breusys veu gans erel i dhe hwilas rag sewena hag arghans. I a dhallathas avel bagas yn unn kana versyons kanow gans Pink Floyd, U2, Bob Dylan, Neil Young ha'n Beatles kyns skrifa ha performya aga hanow aga honan. Aga ilow o gans gis rokk-gwerin, mes gans tabouryow hengovek Innu (henwys makushan). Yn kettermyn, Vollant ha McKenzie a weresas fondya Innu Nikamu, gool ilow genesik.

Yn 1988 yth esens yn towlen bellwolok a-dro dhe bobel Innu. Wosa henna askorrer Guy Trépanier a wovynnas i dhe rekordya aga huntiilow kynsa henwys Kashtin yn 1989 yn Montreal. Kyn rekordys an kuntilow na y'n yeth Innu-aimun, leverys gans 12,000 a bobel y'n Norvys yn unnik, yn skon an kuntilow a dheth dhe vos sewena meur yn Kebek, Greunland ha Kanada Sowsnek ynwedh, destys avel platinom dewblek ha gwaynya Prix Félix rag An Gwella Kuntilow Kynsa. "E Uassiuian" ha "Tshinanu" o kanow gerys da dhe'n bagas.

Yn 1990, an bagas eth war dorn sewen a Europa. I a dhrehedhas an deg kan a-wartha y'n Pow Frynk.

Yn 1991, Kashtin a dhallathas aga thorn kynsa a-dreus Kanada y'n gwenton ha hav, ha dyllys o aga nessa kuntilow, Innu, y'n kynnyav. Y teuth an gan moyha sewen yn Kanada a'n kuntilow na, hag ynwedh aga unnik kan Sowsnek, versyon a "Son of the Sun" gans Willie Dunn. Henwys veu an kuntilow rag an Pewas Juno, h.y Best World Beat Recording ha Best Roots and Traditional Album yn 1992.

Yn 1992, i a dhiskwedhas war dowlen bellwolok CBC Television, Ear to the Ground, ha keskows pellwolok Indian Time II: Fly With Eagles. An vledhen a sew, dalghennys McKenzie rag lewya aperys. Ev a veu y'n prison rak nebes misow 1994.

Dyllys aga tressa kuntilow yn 1994, Akua Tuta, gans Columbia Records. Synsys an gan Akua Tuta gans Robbie Robertson war y guntilow Music for The Native Americans. Aga hanow veu war sonlerghyow an fylm Dance Me Outside ha'n towlennow pellwolok Northern Exposure ha Due South, ha henwys o an kuntilow rag Pewas Juno yn 1995, h.y Best Aboriginal Recording.

Wosa Akua Tuta, Vollant a dheklaryas y dhe gara kemeres powes rag ilow. McKenzie a dhyllas y guntilow solo kynsa Innu Town yn 1996, hag y tehwelis Vollant yn 1999 gans kuntilow solo Nipaiamianan. Ottomma diwedh aga resegva avel Kashtin, kyns i a weras ilewydh hip hop Samian war y versyon a "Tshinanu" yn 2010.

Plasenskrif[golegi | pennfenten]

  • Kashtin (1989)
  • Innu (1991)
  • Akua Tuta (1994)