David Richard Evans
Pronter, bardh ha prydydh Kernewek o David Richard Evans (29 Kevardhu 1879 - 10 Kevardhu 1973), aswonys ynwedh avel D.R.Evans.
Bewnans a-varr
[golegi | pennfenten]Genys veu David Richard Evans yn Abertawe, Kembra yn 1879, mab direyth Anne Evans a Llanllwchaearn yn Ceredigion. Ny wodhya piw o y das. Megys veu gans y famm, modrep ha mamm wynn pan veu yowynk. Yth erviras bos dyskader, hag erbynn 1901, yth esa owth oberi yn skol yn Gelligaer. Byttegyns, y'n keth bledhen ev a dhallathas kors yn Pennskol Kembra, ow kwaynya skolorieth yn 1904. Ena yth eth dhe Golji St Michael yn Llandaff, kolji divinita rag pronteryon, ow kradhya yn 1908.
Resegva avel pronter
[golegi | pennfenten]Wosa termyn yn Abertawe, y removas dhe Sydenham, Loundres holergh yn 1911. Apoyntyansow a sewyas yn Guildford ha Byfleet yn Surrey, Sheffield ha Greenwich kyns ev dhe gavos kummyas dhe venystra yn eskobeth Southwark yn 1920. Gwrys veu kurat pluw Malden, Surrey yn 1932. Wosa Nessa Bresel an Bys yn 1948, ev a removas dhe bluw Sen Meryn avel pronter, owth omdenna yn 1958 dhe Worthing, Sussex. Ev a verwis ena yn 1973.
Teylu
[golegi | pennfenten]Yn Kensington, Loundres yn 1914 ev a dhemedhas Vera Petrides (1888 - 1979), deg bledhen y yowynkka ha myrgh dhe wikor. I a gavas peswar flogh, Richard Neville (1915 - 2005), Iris Vera (1917 - 2000), David M D (1923 - ) ha Nell D L (1927 - ).
An yeth Kernewek
[golegi | pennfenten]Wosa remova dhe Sen Meryn, ev a dhyskas an yeth Kernewek. Gweythresek o yn Kowethas Kernow Goth Lannwedhenek. Dyskader klass ow yn Lannwedhenek. Ev a wre pregothow yn Kernewek yn fenowgh. Berdhys veu yn 1949 gans an hanow bardhek Gwas Cadok. Ev a servyas avel Kannas Bardh Meur yntra 1952 ha 1962. Ev a wre skrifa bardhonieth rag An Lef Kernewek, ow komprehendya An Vorvran hag Enef Car. Yn-mysk y dhyllansow yma treylyans a 'Aweyl herwydh Matthew', 'Lyver Whethlow' (1964), eyldyllys avel 'Lyver Henwhethlow' yn (1973).