An hwerydh Wachowski

Dhyworth Wikipedya, an godhoniador rydh
Jump to navigation Jump to search

Lana Wachowski (genys 21a Gortheren, 1965 avel Larry Wachowski) ha Lilly Wachowski (genys 29ves Kevardhu, 1967 avel Andy Wachowski) yw kevarwodhoryon, skriforyon ha askororyon fylm ha pellwolok Amerikanek. An hwerydh yw benenes dreusynedhek (po treusreydhel). Aswonnys yns i yn-dann an hanow an hwerydh Wachowski (hag, y'n termyn usi passyes, an vreder Wachowski ha'n geskerensow Wachowski).

I re oberas war-barth avel para skrifa ha kevarwodha dre vrassa rann aga resegvaow galwesik. I a dhallathas kevarwodha yn 1996 gans an fylm Bound. I a dheuth ha bos aswonnys gans aga nessa fylm The Matrix yn 1999. Hemm o sewena meur y'n skovva toknys hag i a waynyas pewas Saturn rag a gwella kevarwodher. I a skrifas ha kevarwodha y dhew fylm sewya: The Matrix Reloaded ha The Matrix Revolutions (an dhew yn 2003).

Wosa sewena genwerthel kevres The Matrix, i a skrifas hag askorra fylm 2005 V for Vendetta (desedhans a'n romans grafek gans Alan Moore ha David Lloyd). Yn 2008 i a dhellos fylm Speed Racer, desedhans gwrians-bew a'n kevres anime Nihonek. Aga fylm nessa, Cloud Atlas, selys war an romans gans David Mitchell ha kesskrifys ha keskevarwodhys gans Tom Tykwer, a veu dyllys yn 2012. Aga fylm Jupiter Ascending ha'n kevres Netflix Sense8 (keswrys gans J. Michael Straczynski) a veu dyllys yn 2015.

An nessa seson Sense8 yn 2018 o omgemeryans awenus kynsa Lana heb Lilly. Wosa hemma, an hwerydh Wachowski re beu owth oberi yn tiblans. Yma Lilly ow skrifa ha bos askorrer gwythresek rag Work in Progress (2019) gans furvyoryon Abby McEnany ha Tim Mason, ha Lana ow fylmya fylm Matrix peswora tewlys rag 2021, skrifys gensi, David Mitchell hag Aleksandar Hemon.

Yma'n erthygel ma owth usya an Furv Skrifys Savonek a-barth Kernowek kres.