Ordinali

An Ordinali yw bagas a dri gwari gwers Kernewek, skrifys yn kwirhaval gans menegh yn Kollji Glasnedh y'n 14ves kansbledhen. Mater chif an gwariow ma yw kryjyans kristyon: yma themow dhyworth an Bibel hag a'n henhwedhlow kryjyansek a o kemmyn yn Europa y'n Osow Kres. Y's gwariys onan pub dydh yn "plenys an gwari" rownd hag o ygor dhe'n ayr.

Aswonvos an Ordinali re besya bys yn termyn Kernewek Diwedhes. William Jordan a dreylya Origo Mundi yn furv nowydh (Gwrians an Bys) y'n 17ves kansbledhen, ha'n antikwaris a Skol Lulynn a aswoni an gwariow ha gwitha aga mammskrifow. Yn 1859, Edwin Norris a dhyllas an Ordinali yn-dann an hanow The Ancient Cornish Drama, war-barth gans Sowsnekheans ha gramasek Kernewek.

Origo Mundi

Origo Mundi (an hanow Latin rag "Gwrians an Bys" po "Dallethvos an Bys") yw an Kynsa rann a'n Ordinali. Yma mater an gwari ow synsi ynno lies hwarfedhyans a'n Testament Koth, h.y.:

gwryans an bys gans Duw; istori a Adam hag Eva, hag a Gaym, Abel ha Seth (an kynsa 916 gwers)
hwedhel Noy ha'n Liv (341 gwers)
hwedhel Abram ha'y vab Ysak (135 gwers)
derivas Moyses ha'n Eskerdh dhyworth Ejyp (503 gwers), ha
derivas an vyghternedh Davydh ha Salamon (947 gwers).

Passio Christi

Hanow an gwari a styr "Passyon Krist" yn tiblans. Mater an gwari ma yw enebieth Yesu Krist ha Satnas, trial Yesu, ha'y dhugan ha mernans war an Grows. Y skrifas versyon moy diwedhes a'n gwari avel Passyon agan Arlodh.

Resurrectio Domini

Yma Resurrectio Domini ("Dasserghyans Agan Arlodh") a-dro dhe dhasvewnans Yesu.

Peswara gwari?

A-dhiwedhar Dr Ken George ha Keith Syed re brofyas yth esa unnweyth unn peswara gwari yn kever oberow Yesu pan ova flogh. (An Gannas, mis-Hedra 2005)

An tekst kowal

Kampollans

Graham Sandercock. A Very Brief History of the Cornish Language, Hayle: Kesva an Taves Kernewek, 1996

Porth Kernow – Tre rag folennow ha klassys Wikipedya a-dro dhe Gernow.