Yesu Krist

Dhyworth Wikipedya, an godhoniador rydh
Imaj Yesu yn lymnans Orthodoks russek a'n 17ves kansblydhen.

Yesu, po Yesus (genys 6-4 kyns OK, marow 29-33 OK), o pregowther yedhowek yn termyn an Emperoureth Romanek; ev yw person kres Kristoneth. Herwydh Kristonyon, yma Yesu ow kul unn a dri person y'n Drynses Sans, warbarth gans Dyw an Tas ha'n Spyrys Sans. Yn Gwrians an Bys, tybyans an Drynses yw styrys a'n par ma: "try ython in vn Substance/ comprehendys in vdn dew" (tri yth on yn unn substans, komprehendys yn unn dyw [1]). Mes den o va keffrys, ha mab Maria Wynn. War-lergh an Aweylys, Dyw an Maw a dheuth ha bos den rag prena denses a'y beghes. An oberenn ma ev a gowlwrys der y dhughan ha krowsyans, herwydh an Bibel.

War-lergh kryjyansow erell, profoes o Yesu (homm yw an dyskas rag ensampel a Islam hag a'n Fay Bahá'í). Yesu yw profoes a vri yn Islam; yth aswonnys ev avel عيسى (Isa). Yma nebes 74 gwers a'n Qur'án ow kampoella Isa/Yesu avel profoes a Islam hag a dhehwelsa Dydh Breus.

Krist yw titel ow styrya olewys (gans Dyw); an titel ma yw devedhys a'n ger Grew χριστός (leverys ghristos), ha styry an ger Ebrow משיח (mashiah).

Hanow Yesu yw devedhys a'n ger Greka Ιησούς yesous. Dell grys lies skoloryon, an hanow Greka yw devedhys a-dhia furv Aramek hag Ebrow ישוע Yeshoua. Yn tekstow Kernewek hengovek, Yesu yw berrhes avel IHC, henn yw an teyr hynsa lytherenn a'n hanow Grew: Η yw η veur, ha Σσ o skrifys avel Cc menowgh y'n Oesow Kres.