Rythym ha blous

	John Lee Hooker
Ensampel a	eghen a ilewydh
Klass	ilewydh gerysda
Label teythyek	Rhythm and blues
Dalleth/Fondya	1938
	Restrennow kelmys war Gemmyn Wikimedia

Eghen a vusek afro-amerikanek a dhallathas e'n 1940ow ew rythym ha blous, berrhes dhe R&B dell ew usys.

Ma R&B moy gerysda hedhyw ages an 1940ow, pan dhallathas. Hi a gomprehend 'jump blues', 'doo-wop', 'soul', an twist, Motown, disco, 'funk', rap ha hip-hop. Drefen hy dhe janjya en feur dres an bledhydnyow, possybyl ew dhe wul mencyon "rhythm ha blous hengovek" ha "rhythm ha blous kevos". Hi a dhallathas en Sekond Gwerryans an Bes pan eth meur a dus du a statys soth an Statys Unys rag oberi e'n citys meur.

Usys veu an term "Rhythm and Blues" en kensa en 1949 gen Jerry Wexler en lever termyn "Billboard". Dell wra an term kampoll, rythym ha blous a dheuth dhort an blous, bes em dhe hei pols krev (ema dhe'n brassa radn a ganow R&B pajar pols e'n barr gen an poslev war an sekond ha pajwora pols).

R&B a-varr

E rekordyas Louis Jordan "G. I. Jive" en 1944, "Caldonia" en 1945 ha "Choo Choo Ch'Boogie" en 1946, en ehen henwys jump blues.

An 1950ow

En 1949, Fats Domino a rekordyas "The Fat Man" hag en 1956 versyon a'n gan "Blueberry Hill". Chuck Berry a rekordyas "Maybellene" en 1955 ha "Roll Over Beethoven" en 1956. Chuck Berry ew gelwys matern R&B.

Udn aral o Little Richard a rekordyas "Tutti Frutti" en 1955, "Long Tall Sally" ha "Good Golly Miss Molly" en 1958.

E'n 1950ow R&B a dhisplegyas dhe 'rock'n'roll' pan wrug kanoryon gwydn pekar ha Bill Haley hag Elvis Presley settya kanow gwlas dhe rythmow R&B. R&B ew gelwys "rock'n'roll du" terweythyow ha kanoryon pekar ha Fats Domino, Chuck Berry ha Little Richard ew konsidrys emesk ragresoryon rock'n'roll.

Soul

Styr soul ew "enev". Leveris ew kaner ha pianydh Ray Charles dhe dhevisya soul. Ev a dhallathas rekordya en 1951.

Onan aral a dhallathas e'n keth termyn o James Brown a dhisplegyas funk. Haval ort soul ew funk bes an poslev ew war gensa pols an barr gen rythym treusakennek.

An 1960ow

An Twist

En 1959 Hank Ballard and the Midnighters a rekordyas "Teardrops on Your Letter". War du aral an brekord o kan henwys "The Twist". En 1960 Chubby Checker a rekordyas y versyon y honan a "The Twist", hag ev a dhevisyas dons rag mos gen an gan. E teuth an dons fest gerysda en ollvesek. An nessa bledhen Chubby Checker a rekordyas "Let's Twist Again".

Motown

En 1959 fondys veu kowethyans Motown gen Berry Gordy en Detroit. Kanoryon moyha gerysda Motown ew Diana Ross, Smokey Robinson, Stevie Wonder ha Michael Jackson.

R&B en Breten Veur

E'n 1960ow bagasow pekar ha'n Rolling Stones, Manfred Mann ha'n Kinks a wre goslowes ort rekords koth R&B ha gwari ehen dredanek a R&B.

Tus eral a vri en R&B

Tus erel a vri en R&B a gomprehend Booker T and the MG's, Sly & The Family Stone, Ike Turner, Tina Turner, Whitney Houston, Destiny's Child (a gomprehendyas Beyoncé), Luther Vandross, Alexandra Burke ha Mary J Blige.