Leonard Rae Moir

Leonard Rae Moir (9 Gortheren 1889 - 23 Gortheren 1982) o ynjynyor, prydydh ha bardh a Orsedh Kernow.

Teylu ha bewnans a-varr

Genys veu Leonard Moir yn 1889 yn Montrose, Alban, an hweghves a naw flogh dhe William Chassar Moir, spiser ha gwikor gwin, hag Alexina (neé Clark). Wosa adhysk yn Montrose Academy, yn 1906 yth eth dhe Bennskol Birmingham rag studhya ynjynorieth civil, ow kradhya yn 1909 gans B.Sc.. Y vynnes o spena teyr bledhen owth oberi yn sodhva hwel dowr. Erbynn 1911 ev a gevrenna chi gans ynjynoryon erel hag oberi yn hwel dowr Masham yn Konteth Evrek. Yn 1913 ev eth dhe Antafagasta yn Chile avel ynjyntor. Yn Kynsa Bresel an Bys ev a omjunyas Troslu Skav Duk Kernow, ow kwaynya an Grows Vreselek yn 1916. An devyn a lever ev dhe dhiskwedha kolonekter apert. Ev a rewlyas bagas oberi gans kolonekter ha skians, owth aga hebronk dres tir gwastas yn saw heb kelli onan anedha. Yn Metheven 1917 ev a dhemedhis Ruth Agnes Paull (1897 - 1976) a Gammbronn. I a gavas diw vyrgh, Rae Paull Moir (1918 - 1993) ha Mary Vivian Moir (1922 - 2019). War dhiwedh an vresel, ev a oberas yn asrannow hwel dowr, dowrgledhyans ha fordhow yn Konsel Cita Leeds. Yn 1937 ev a gavas sodh gans an keth konsel avel Isynjynyor Fordhow.

An yeth Kernewek

Moir a dhisplegyas bern y'n yeth Kernewek wosa omdenna dhe Gernow le may teuth y wreg, keffrys hag istori ha henhwedhlow Kernow. Yn 1957 ev a veu berdhys gans an hanow bardhek Car Albanek der apposyans. Rag termyn ev o esel konsel an Orsedh. Ev a skrifa prydydhieth, ow kwaynya kesstrifow an Orsedh (an Hanaf Mordon-Caradar) moy ages unnweyth. Dyllys veu re a'n kanow yn lyver termyn Keffrysyans Kowethasow Kernow Goth, kepar ha An Map Dyworth an Yst, Gwythyoryon an Eglos, Spyrysyon an Vengledhyoryon ha Whethel an Cor Kernewek. Ev o skrifenyas hag islewydh an Keffrysyans rag termyn hir, ha golegydh lyver termyn an Keffrysyans bys dhe'y vernans yn 1982.