|
Hindoueth yw kryjyans dharmek ow talleth yn Eynda. Yma a-dro dhe 940 milyon a dhyskyblon y'n nor, gelwys Hindouyon, ha 94 kansran anedha yn Eynda hag Asi Soth. Gnas arbennik a Hindoueth yw dyversita kryjyansow, praktisyow ha skryptors. Byttegyns, yma unnses yn mysk an dyffransow ma, del dheriv an linen ma a'n Ryg Veda (Lyver I, Hymna CLXIV, Gwers 46): एकम् सत् विप्राः बहुधा वदन्ति (treuslytherennans: Ekam Sat Viprāḥ Bahudhā Vadanti; yn Kernewek: Onan yw an Gwir, mes an Dhothyon a's aswon avel Lies.)
An Vedas yw hen skryptors an wonisogeth Eyndo-Aryanek. Yth yns i kuntelles hymnys ha dyskansow gwrys a-dro dhe'n vledhen 1000 kyns an Oes Kemmyn, hag i holys hwath gans Hindouyon. Mes skryptors pals re devis a-dhia an oos Vedek, y'ga mysk kampolasow skyansek (r.e. an Upanishads ha Brahmanas) ha dew vardhonek meur mythologiek, Mahabharata ha Ramayana. Rann boosek an Mahabharata yw an Bhagavad Gita, yn le'ma Kryshna ow tisplegya dhe Arjuna lies poynt selvenek a dybyans Hindou.
|
|
Emily Hobhouse (1860-1926) o aktivydh Predennik a-barth sewena ha kres. Hi yw gwella kevys rag diskwedhes an studh a dus gwrys prisner yn Bresel Afrika Dheghow. Genys yn Lyskerrys, hy thas o pronter yn Eglos Pow Sows.
Wosa mernans hy thas yn 1895, Hobhouse eth dhe Minnesota, Statys Unys rag pregotha dhe'n dus bal kernewek ena. Hi a dhehwelis dhe Vreten Veur yn 1900, mes a wrug vyaj dhe Afrika Dhyhow y'n bledhen na, 1901, ha 1903; yth esa hi dyskadores yn Afrika Dheghow 1905-1908.
Hi o fest erbyn Kynsa Bresel an Bys. Yn 1920, hy herens yn Afrika Deghow a dhannvenis dhedhi arhans y prenno hi chi yn Kernow. Ytho, Hobhouse a brenas chi yn Porthia. Y ferwis hi yn 1926 yn Loundres.
|
