Gorsav Logh
Gorsav Logh (Sowsnek: Looe railway station) a serv kemenethow yn Logh ha Porth Byghan yn Kernow. Penn-hyns an Linen Nans Logh yw, 8.75 mildir (14 km) dhe soth a Lyskerrys.
Istori
[golegi | pennfenten]
Ygerys veu an Hyns-horn Lyskerrys ha Logh war 27ves mis Kepardhu 1860 rag karya gwara yntra Lyskerrys ha Logh, owth eylworra an Dowrgleudh Kesunyans Lyskerrys ha Logh. Trenow trethysi a dhallathas war 11ves mis Gwynngala 1879.
Anusadow o an gorsav avel penn-hyns drefen nag esa saw kay unsel ha lergh, heb loup rag an jynn dhe bonya a-dro dh'y dren rag an viaj delergh. Pub tren a besyas dhe'n krowjiow kochys ha jynnow esa desedhys ynter an gorsav ha'n pons fordh der an Dowr Logh. Yth esa lerghow-gwitha rag gwara ynter an krowjiow ha'n avon, mes rann mogha an gwara eth dhe Gay Buller.
Kist sinellow Logh veu desedhys yn krow war an kay. Yth esa eth lever ynno ha deges veu yn 1964.
An skorr Logh, avel lies linen-skorr yn Kernow, veu profyes rag degeans y'n 1963 Derivas Beeching. An lerghow-gwitha dres an gorsav veu deges yn mis Du 1963 ha treghys veu an linen gans 110 lath yn mis Ebrel 1968; yma gorsav kreslu Logh war dyller byldyans an gorsav ha rann a'n kay. Post mildir mann veu desedhys ogas ha'n pons fordh der an avon ple junyas an hyns-horn gans an lerghow-gwitha privedh dhe Gay Buller. An gorsav gwreydhek veu 14 chayn (252 lath po 231 meter) dhe north an poynt ma, mes an linen re beu berrhes lies gweyth der an bledhynnyow; hemm a styr bos an post a verk ¼ mildir dhyworth 'penn' an linen a-dal an kay arnowyth usi 20 lath dhyworth penn an hyns-horn a-lemmyn.
Deskrifans
[golegi | pennfenten]
Yma unsel kay ha skovva dhe Logh a-gledh dhe drenow a dhrehedh dhyworth Lyslerrys. Nyns yw toknys prenadow dhe worsav Logh, ytho yma res aga frena dhyworth an gwithyas-tren. Yma gwel-parkya byghan ryb tenewen an gorsav.
Servisyow
[golegi | pennfenten]Y'n euryador Me 2017, yma 12 dibarth war dhydhyow an seythen ha dydhyow Sadorn y'n gwav, 14 war dhydhyow Sadorn ha 10 war dhydhyow Sul y'n hav. Nyns usi trenow dydh Sul y'n gwav.